ඒක අමුතුම ඉවෙන්ට් එකක්

වසරේ බ්ලොග්කාරිණිය යශෝධා සම්මානී 

හැමෝම තරඟෙට නෙලුම්යාය ගැන පෝස්ට් දාන එකේ මමත් එකක් දානවා, හැක්. මෙවන් උත්සවයකට සහභාගී වූ මුල්වතාව කියල කියන්න පුළුවන්. ඒකට හේතුව ඒක මම සහභාගී වූ මුල්ම හයිබ්‍රිඩ් ඉවෙන්ට් එක. ඒක සම්මාන උත්සවයක් විතරක් නෙමෙයි, ඒක මිතුරන්ගේ හමුවක්, එක්තරා විදිහක එක පවුලක කට්ටියක් එකතුවුණු පවුලේ උත්සවයක්, අවංකව එකිනෙකාගේ හැකියාවන් ඉදිරිපත් කරන්න සහ අගයන්න අවස්ථාවක්. ඒක නිසා ඒක අමුතුම ඉවෙන්ට් එකක්.

අනික් අය ලියල තියෙන ඒවයේ එහෙන් මෙහෙන් අඩුපාඩු තිබුණ වගේ දේවල් කියල තිබුණා. අඩු පාඩු තිබ්බා කියන එක මම නම් පිළිගන්නේ නැහැ. එකම එක අඩුපාඩුවක් වත් මම නම් දැක්කේ නැහැ. මගේ වෘත්තීය ජීවිතයේ මිලියන 10 -20 වියදම් කර පවත්වමු සම්මාන උත්සව සංවිධානය කරල තියෙනවා සහ තවත් විශාල ප්‍රමාණයකට සහභාගී වෙලා තියෙනවා. ඒවා සරුව පිත්තල උත්සව. ප්‍රේක්ෂකයින් ලෙස සහභාගී වෙන අයටවත් ඒවායේ මුදලට පර්ෆෝම් කරන අයටවත් එච්චර ගැම්මක් නැහැ. සමහරු එන්නේ නෑවිත් බැරිකමට. රාජකාරියේ වගකීමක් නිසා. සමහරු එන්නේ නොමිලේ කාල යන්න නැත්නම් බීල යන්න, සමහරු ඉවර වෙන්නේ කීයටද කියල බලගෙන ඉන්නෙ.

නෙලුම්යාය මම දැකපු නිර්ව්‍යාජ සම්මාන උළෙලවල් ඉතාමත් සුළු ප්‍රමාණයෙන් එකක්. නිර්ව්‍යාජම උත්සවය කිව්වත් වැරදි නැහැ. සංවිධානය කලේ, ඉදිරිපත් කලේ, (කරු හැර අනෙක්) ත්‍යාග දුන්නේ, ඔක්කොම බ්ලොග් ලියන අය. හේතුපාඨ  ලියපු අයත්, හේතුපාඨ කියවන්නාත්, ත්‍යාග දෙන්නාත් ගන්නාත්, ඔල්වරසන් දෙන්නාත් යන සියළු දෙනාම එකම ගොඩේ අය. ඔක්කොම එකිනෙකාගේ දක්ෂතාවන් දන්නා, අගය කරන,  බ්ලොග් කාරයෝ. තත්ත්ව තරාතිරම් නැති එක ගොඩේ එක රැහැනකින් බැඳුණු අය. සම්මාන දෙන්නාත් ගන්නාත් අතර ආදරයක්, බැඳීමක් එකිනෙකා ගැන ගෞරවයක් තිබුණා විතරක් නෙමෙයි ඒක බලාගෙන ඉන්න අයට හැඟුණා.  සහභාගී වුණ අය ඔක්කොම එතෙන්ට ආවේ කිසිම බලකිරීමක් නැතු ස්ව කැමැත්තෙන් සහ මහත් ඕනෑකමින්. බලන් ඉන්න අය අත්පුඩි ගැහුවේ ගහන්න ඕනවට නෙමෙයි. හිතෙන්ම නැඟෙන සතුටට.

මේවගේ නිර්ව්‍යාජ උත්සවයකදී කවුරුවත් කාටහරි වැරදෙනකන් හිනා වෙන්න ඇඟිලි දික් කරන්න බලාගෙන ඉන්නෙත්  නැහැ හිටියෙත් නැහැ. ඒක නිසා සජ්ජා වෙන ෆෝරම් එකක කිව්ව සංගීතය ගැන ප්‍රශ්ණයවත් කල්යාණ මිත්‍ර ගේ පොස්ට් එකේ  කියන ඩිලාගේ ඉදිරිපත් කිරීමේ ප්‍රශ්ණයක් වත් මම නම් දැක්කේ නැහැ.ඔවුන් දෙදෙනා ගේ ඉදිරිපත් කිරීම මට නම් ගව් ගණනක් ඉදිරියෙන්. මුදල් ගෙවා ගන්නා වෘත්තීමය ඉදිරිපත් කරන්නන්ට වඩා ඉවාන් සහ ඩිලා කරපු ඉදිරිපත් කිරීමේ මම කියන නිර්ව්‍යාජ බව හොඳටම පෙණුනා . ඒක මුදල් ගෙවා ගන්න බැහැ. 

ටොයි බයි නාට්‍යයේ තිබිච්ච අවස්ථාවට සහ ඕඩියන්ස් එකට නුසුදුසු බව  අති උසස් රා.සේ.පී නාට්‍යයෙන් කැපිල ගියා. අජන්ත පීරිස් ගෙන්න ගත්තේ ගීත කිහිපයක් කියන්න. මුළු වෙලාවෙම එතන ඉඳලත් ඔහුට හැකි වුණේ බ්ලොග් ලියන නුවන් වර්ණකුලසූරිය රචනා කල ගඟ නුඹට මා පෙම් කලා ගීතය කියන්න විතරයි. ඒ වුණාට එයා කොච්චර නෙලුම්යාය ගැන සතුටුද කියනවනම් ඉවර වෙනකම්ම ඉඳල බ්ලොග් ගැන ප්‍රශ්ණ මහ ගොඩක් ඇහුව. නොමිලේම සහභාගී වුණු ඔහුත් එතන හිටපු අයට සහ දැකපු දේට එච්චර බැඳුන.

තව පොඩි එකක් . ක්‍රිකට් තරඟ වගේ දේවල් වලදී තරඟයෙ වීරයා තෝරන කොට තරඟයේ සාර්ථකත්වයට විශාල වශයෙන්ම බලපෑ කෙනෙක් තෝරනවා කියා දන්නවනේ. මේකේ සංවිධාන කටයුතු වලට එහෙන් මෙහෙන් (වැඩි මාන්සියක් නැතුව ) සයිඩ් එකෙන් සම්බන්ධ වුණ නිසා මට පුළුවන් මේ සම්මාන උලෙලේ වීරයා උළෙලේ සාර්ථකත්වයට වඩාත්ම වැඩි දායකත්වය දුන්න උත්සවයේ කොඳුනාරටිය වුණ වීරයා කවුද කියල කියන්න. 

ඒ  වීරයා තමයි මේ.

අජිත් රැගත් ගුවන් යානය කවදා ගොඩ බහී දැයි බලා සිටින කමියා

අවසන් කාරණය නම් ඉයන්ගේ අඩවිය තරඟ වලින් ඉවත් කරගැනීම. එලෙස තරඟ වලින් බ්ලොග් ඉවත්කරගන්නා අය සහ එසේ ඉවත් කර ගැනීම ගැන විවිධ මත බස්සිගේ අඩවියේ කමෙන්ට් වලත් වෙනත් තැන් වලත් මම දැක්ක. මම සිංහල බ්ලොග් වලට ආධුනිකයෙක්. අනික සම්මාන වලට සුදුසු පෝස්ට් මම ලියල තිබුණේ නැහැ. එම නිසා අයින් වීමෙන් කාටවත් වාසියක් නම් වුණේ නැහැ. අනික ජයග්‍රාහීන් වන බස්සි, රවී, කෞශි, කුරුටු, ශ්‍රංග ඉකොනොමැට්ටා වගේ බ්ලොග් සමඟ මගේ එක ලඟකින් වත් තියන්න බැහැ කියල කියන්න මට කිසිම ලැජ්ජාවක් නැහැ. අයින් වීමට පැහැදිලි හේතුවක් තිබුණා කියල විතරයි කියන්න පුළුවන්.

මා මිත්‍ර චන්දිම විතානටත් කොලඹ ගමයාටත් හැමෝගෙම ස්තූතිය හිමිවෙන බව දන්නවා. මම හමුවෙන්න ආසාවෙන් ඉන්න රවී වීරසිංහ, ඉකොනොමැට්ටා , නුවර කුමාරි, සිංදු ඇනෝ වගේ අයත් ආවනම් මේ හැන්දෑව මීටත් වඩා හොඳ වෙන්න තිබුණ. වෙන නම් කියන්න දෙයක් නැහැ.

එදා පලමු වරට මූණට මූණ කථා කරන්න ලැබුණු කසුන්, ඔමා, ඩ්‍රැකී, සුරංග, පැරා, රසික, හංසියා, විදානේ, මනෝ, විචා, ගිම්මි, ජීවන, මහේෂ්, ඒවගේම කලින් හමුවෙලා තිබුණ මාතේ, නාකි චෙෆා, බස්සි, ඉවාන්, අජිත්, කමියා, සජ්ජා, අටමා, ලොකු පුතා, කම්මලයා, සුදීක, කසුට්ටා, ඇනෝප්ලීස්, ප්‍රාජේ,  දවස ලස්සන කරපු ඔක්කොටම බොහොම ස්තූතියි.

වසරේ බ්ලොග්කාරිණිය ලෙස සම්මාන ලැබූ ක්ශේත්‍ර බොහොමයක දස්කම් පාන බස්සීට හැමෝගෙන්ම සුභපැතුම්