කල දෙයින් සතුටුවීම

අන්තවාදීව හිතන / ක්‍රියාකරන සුළුතරයක් හැරුනම බොහෝ දෙනෙක් කැමතියි හොඳ දේවල් කරන්න. වැඩකරන තැන, සමාජයේදී, වගේම පවුල තුලත් හොඳ දෙයක් කරන්න බොහෝ දෙනෙක් සිතනවා සහ උත්සාහ ගන්නවා. එහෙම වෙන්නේ ඇයි? හොඳ දෙයක් කලාම අපිට එන සතුටක් නිසාද? බොහෝවිට උත්තරය 'ඔව්' කියන එකයි. ඔබ ගැනම හිතා බලා මීලඟ ප්‍රශ්ණෙට උත්තරය ඔබටම දීගන්න. ඒ සතුට එන්නේ ඔබ හොඳ වැඩක් කල නිසාමද එහෙම නැත්නම් ඔබ කල හොඳ වැඩය ගැන යමෙක් ප්‍රසංශා කලොත්ද? තව විදිහකින් ඇහුවොත් ඔබ සේවය කරන තැන කල හොඳ දේ ගැන කිසිම කෙනෙක් කිසිම අගැයීමක් නොකලොත් ඔබට ඒ ගැන කණගාටුවක් ඇතිවෙනවද? එහෙම කණගාටුවක් ඇතිවෙනව නම් ඔබ සතුටුවෙන්නේ කල හොඳ වැඩේ ගැන නොව ඒ ගැන ලැබෙන අගැයීම් හෝ ප්‍රසංශා ගැන නේද?

මෙහෙම පටන්ගත්තෙ පරණ 2015 පෝස්ට් එකක් ප්‍රතිචක්‍රීකරණය කරන්න ප්‍රවේශයක්

ඉස්කෝලෙ හොඳ ලකුණු ගත්තොත් ටීචර්ස්ල අම්මලා හොඳයි කිව්වෙ නැත්නම් ගතියක් නැහැ. ජොබ් එකේ හොඳට වැඩ කළත් බොසා හොඳයි කිව්වෙ නැත්නම් ගතියක් නැහැ. පවුල් ජීවිතේ මොන කැප කිරීම් කළත් අනික් පාර්ශවය අගය නොකළොත් වැඩක් නැහැ. බ්ලොග් එකේ හොඳ පෝස්ට් එකක් දාල කමෙන්ට්ස් අඩුනම් ගතියක් නැහැ. ඒ කියන්නේ අපි හොඳ දෙයක් කරල සතුටු නොවී අපිට පාලනයක් නැති අයගේ අතට අපේ සතුටේ යතුර භාර දී තිබීම. 

මේ උගුලට අහුනොවී අපි කරන දේවල් ගැන අපිට සෑහීමකට පත්වීමට පුරුදු වුනොත් පිට අයගේ උදව්වක් නැතිවම අපිට අපේ සතුට ලබා ගන්න පුළුවන් වෙනවා. පොඩි කාලේ ඉඳලා ඉස්කෝලෙ හොඳ ලකුණු ගත්තම ටීචර්ලගෙන් හෝ දෙමව්පියන්ගෙන් අගය කිරීමක් බලාපොරොත්තුවෙන් හැදුනම මේකට අපි පුරුදුවෙලා තියෙනවා. මෙතන තියෙන ගැටළුව මේකයි. වැඩ කරන තැන්වල බොහෝ දෙනෙක් ඉන්නේ තමන්ට ඉහලින් ඉන්න බොස් ගෙන් ලකුණු දාගන්න බලාපොරොත්තුවෙන්. ඒ අයට තමන්ගේ ගෝලයන් ගෙන් හොඳ වැඩ ගැන අගය කරන්න මතක් වෙන්නේ නැහැ. ඒවගේ අතරමැදි බොස් කෙනෙක් ඉන්න කෙනෙක්ට හොඳ දෙයක් කලත් අගැයීමක් නොලැබෙන්න පුලුවන්. එවිට අළුත් දෙයක් හෝ හොඳ දෙයක් කිරීමට උත්තේජනයක් නැති නිසා කිසිම අළුත් දෙයක් කරන්න නොහිතන කෙනෙක් වෙලා තමන්ගේම වෘත්තිය සහ ජීවිතය යන දෙකම ඒකාකාරී කරගන්න ඉඩ තියෙනවා.

මේ උගුලෙන් ගැලවෙන්න කැමතිනම් ඒක කරන්නේ මෙහෙමයි. මීට පසුව ඔබ අතින් හොඳ දෙයක් (එනම් මීට කලින් ඔබ අගැයීමක් බලාපොරොත්තු වෙච්ච දෙයක් ) සිදුවුණාම ඒ ගැන කාටවත් කොකියා ඉන්න. හැබැයි තමන්ටම ප්‍රසංශා කරගන්න. හැකිනම් තමන්ටම පොඩි තෑග්ගක් ගන්න. මේක එක පාරක් කරල බලන්න. ඔබ කල දේ ගැන බොස්ට හෝ වෙන කෙනෙකුට කීවිට අගැයීමක් ලැබුණම ලැබෙන සතුටට වඩා වැඩි සතුටක් වඩා වැඩි කාලයක් ඔබගේ හිතේ පවතීවි. මේ විදිහට කීප පාරක් කලාම ඔබටම තේරේවි මේකේ වටිනාකම.

බොස්ට නොකියා යාළුවෙකුටවත් කරපු හොඳ දේ ගැන කියන්න එපා. එතකොට මේකේ ප්‍රතිඵල අඩුවෙනවා. උපරිම ප්‍රතිඵල ගන්න කාටවත් නොකියා ඉන්න ඕන.

මේ ක්‍රමයේ වටිනාම වාසිය ඒක නෙවෙයි. බොස් ගේ ගති අනුව හෝ ඔහු හෝ ඇය එදින ඉන්නා තත්ත්වය අනුව ඔබට සතුටක් නොලැබෙන්නේ ඔබගේ සතුටේ ස්විච් එක බොස්ට බාර දීල තියෙන නිසයි. ඔබ කරන දේවල් වලට ඔබව අගැයීම ඔබම කරනවනම් ඒ ස්විච් එක ඔබේ අතේ.  

ඒ ස්විච් එක ගත්තම ඔබගේ බොස්ටවත්, දෙමව්පියටවත්, දරුවන්ටවත්, ස්වාමියා හෝ භාර්යාවටවත්, ඔබගේ සතුට පාලනය කරන්න ඇති හැකියාව නවතිනවා. 

ලියන්න ලේසියි කරන්න ටිකක් විතර මහන්සිවෙන්න වෙනවා. විශේශයෙන්ම හොඳ වැඩක් කරපු ගමන්ම ඒ ගැන ඉක්මනට තව කෙනෙකුට කියන්න බලාගෙන ඉන්නවනම්. 

මේ වගේ දෙයක් ගැන මම ලියපු සිංදුවක් තමයි මේ තියෙන්නේ. මේකෙ සංගීතය සහ ගායනය විශාරද ජගත් වික්‍රමසිංහ ගෙන්. බණ කිව්වට ඔය ගොල්ලන්ගේ ප්‍රතිචාර බලාපොරොත්තුවෙන් තමයි මේ සින්දුව දාන්නේ.

කළ හොඳ වෙනුවෙන්, තුති  පතනා

මිනිසුන් හැම දා…, හිතේ… දුකින්

හොඳ නම නොපතා…, හොඳ කරනා අය

පින් පලදී හැම, දා……. සතුටින්

දරුවන් දෙගුරුන් , වෙනුවෙන් යුතුකම් 

කළ යුත්තේ පැස, සුම් නොපතා….

අපහට අතදුන් , ලොකු පොඩි හැම හට

අපි තුති …. පුද දෙමු , සදා….. බැතින්

හඬනා හදවත් , සිප සනසා නිති

ඉන් ලැබෙනා සැන  , සී……ම ඇතී

අපි හොඳ කල අය , අප ගරහන කල

උන් වෙනුවෙන් මෙත් , වඩනු වටී …..

කළ හොඳ වෙනුවෙන්, තුති  පතනා

මිනිසුන් හැම දා…, හිතේ… දුකින්

හොඳ නම නොපතා…, හොඳ කරනා අය

පින් පලදී හැම, දා……. සතුටින්

 සංගීතය සහ ගායනය විශාරද ජගත් වික්‍රමසිංහ

පද රචනය : මම

මෙම අඩවියේ පළවන ලිපි කොපි කිරීමට හෝ වෙනස් කතෘ නාමයක් යටතේ අන්තැනක පළකිරීමට කිසිම බාධාවක් නැත. අන් ස්ථානවලින් කොපි කර මෙහි පළකරන ලිපි වලට නම් එම කතෘ වරුන්ගේ කොන්දේසි අදාල වේ.