බල්ලො හුකන්නයි අපි ගුටි කන්නයි

සංසර්ගයේ යෙදෙන සුනඛයන් දෙදෙනෙක්

යම් කිසි බ්ලොග් කරුවෙකු ගැන වෙබ් අඩවියක සඳහන් වුණු ප්‍රවෘත්තියක් ගැන විවිධ මත පළවෙමින් තිබේ. අනුන්ට පහර ගහන අයගේ මෙවලමක් වන ඇනෝ පැමිණ මාතලන්ගේ බ්ලොගයේ අදහස් දක්වන්නෙකු කියා ඇත්තේ එම ප්‍රවෘත්තිය මඩ ප්‍රවෘත්තියක් බවත් එය පළවීමට මමත් වගකිව යුතු බවත්ය.

බොහෝ මිනිසුන් අනුන්ව මනින්නේ තමන්ගේ මිම්මෙන් බව රහසක් නොවේ. මඩ වලින් ජීවත් වන්නන් සිතන්නේ අන් අයටද මඩ ගැසීමට හැර වෙන වැඩක් නැති බවයි. මෑතක් වනතුරු අදාල බ්ලොග් කරුවාගේ බ්ලොග් පිටුව මම නිතර කියවන සහ කමෙන්ට් කරන තැනක් විය. ඒ ඔහු උග්‍ර මහින්ද හිතවාදියෙකු වුවත් ඔහුගේ හාස්‍ය සහ උපහාසය ඉතා රසවත් වූ බැවිනි. පසු කාලයකදී එය ඇනෝ වරුන්ට ඔවුන් අකමැති දේශපාලන හෝ අනිකුත් අදහස් දරණ අයට හිතූමතේ මඩ ගැසීමට පමණක්ම වූ බ්ලොග් පිටුවක් වූ පසු එහි කමෙන්ට් කිරීම හෝ චෝදනා වලට ප්‍රති උත්තර බැඳීම අතහැර දැමුවෙමි. එක්තරා හමුවකදී එක් වරක් ඔහු පෞද්ගලිකව හමුවී ඇත්තෙමි. පාසැලේ ආසන්න සමකාලීනයෙකුද වූ ඔහු හමුවීම එකල මට සතුටුදායක දෙයක් විය. පසු කාලයකදී ඔහුගේ බ්ලොග් පිටුව මෙහෙයවූ ආකාරය දුටු විට නම් හමුවීම ගැන ඇති වුණේ පශ්චත්තාපයකි. 

මේ ප්‍රවෘත්තියට අදාල සත්‍ය අසත්‍යතාවය දන්නේ අදාල බ්ලොග් කරුවා සහ ප්‍රවෘත්තියේ දක්වා ඇති පැමිණිල්ල කල අය සහ එය පල කල වෙබ් අඩවියයි. එම ප්‍රවෘත්තිය අසත්‍යක් නම් එයට අදාල අය විසින් මෙලොව සහ බුදුදහම් අනුව සංසාරයේදී එය ගෙවනු ඇත. එය සත්‍ය නම් අදාල පුද්ගලයා එයට මුහුණ දිය යුත්තේ බ්ලොග් ලෝකයේ නොව අන් අදාල අංශ වලදීය. කොහෙවත් පළවූ ප්‍රවෘත්තියක් ගෙන අන් අයට අවලාද නැගීම මට සිහිකලේ ඇම්ඩා ගේ 'බල්ලො හුකන්නයි අපි ගුටි කන්නයි' නම් වැකියයි. 

එකිනෙකාගේ දේශපාලන අදහස් සහ අනිකුත් අදහස් වෙනස් වුවත් මිතුරන් ලෙස එකිනෙකා සමඟ කථා කිරීම හමුවීම අදහස් හුවමාරු කරගැනීමට එය බාධාවක් ලෙස කවදාවත් නොසිතුවෙමි. පිටස්තර ලෝකයේ හිටපු ජනාධිපතිතුමාගේ ආධාර කරුවන් මගේ මිත්‍රයෝ වෙති. ඔවුන් හමුවූ විට දේශපාලන හින්ට් ඇර ගැනීම සැමටම සතුටුවීමට දෙයක් පමණි. මට ඔවුන්ව වෙනස් කල නොහැකි බවත් ඔවුන්ට මා වෙනස් කල නොහැකි බවත් වටහා ගැනීම එම අන්‍යෝන්‍ය ගෞරවයට සහ පිළිගැනීමට හේතුවයි. බ්ලොග් ලෝකයේ ලොකු පුතාද එවැන්නෙකි. උග්‍ර මහින්දවාදියෙකු වන ඔහුගේ සමහර පිළිතුරු කමෙන්ට්  මා තව වරක් සිතීමට පවා පෙලඹවූ අවස්ථා තිබී ඇත. කිහිප වරක්ම හමුවී ඇති ඔහු නැවත කසුන් සහ නිර්මාණී ගේ මංගල උත්සවයේ හමුවී ආශ්වාදජනක පැය කිහිපයක් ගෙවා දැම්මෙමු. එහෙත් දේශපාලනිකව කොන් දෙකක සිටින අපි දෙදෙනා ඉදිරියෙදීද මතවාදීව ගැටෙනු ඇත.

සමාජයක ජීවත්වන විට එකිනෙකාගේ සීමා මායිම් පැණීමට නීතිමය හෝ සමාජයීය අවකාශයක් නැත. එසේ කරන්නේනම් එය නීති විරෝධී ක්‍රියාවක් වේ. එය බ්ලොග් සමාජයටත් පොදු විය යුතුය. එම සීමා මායිම් ගණන් නොගන්නා තම අරමුණු වෙනුවෙන්ම කෙනෙකුගේ පෞද්ගලිකත්වයට හානි කිරීමට මැළි නොවන අය හා කිසිම ගණුදෙණුවකට මගේ කැමත්තක් නැත. එවැන්නෙකුගේ වෘත්තිය, උගත් පාසැල හෝ අන් සම්බන්ධතා කුමක් වූවත් ඔවුන් මනසින් ඉවත් කර දැමීම මට යහපත් බව මගේ පිළිගැනීමයි. එසේ නොකර ඔවුන් ගැන බොරු ප්‍රවෘත්ති මැවීමක් හෝ ප්‍රචාරණය කිරීමක් මා තනියම හෝ අන් කෙනෙකු සමඟ සම්බන්ධවී කර නැති අතර ඉදිරියේදීවත් ඔවුන් පිණුම් ගසනා ඒ පහත් අඩියට වැටීමට මගේ කිසිම අදහසකුත් නැත.

මේ පුද්ගලයාට චෝදනා කරමින් පළවුණ ප්‍රවෘත්තියේ සඳහන් දේ ගැන හෝ එහි සත්‍ය අසත්‍යතාවය ගැන මගේ දැනීමක් නැත. ඒ සිද්ධිය සම්බන්ධ කරගෙන ඒ සම්බන්ධයෙන් මම සහ අන් බ්ලොග් කරුවන් එහි පිටුපස සිටී යැයි කෙරෙන චෝදනා වල සත්‍ය-අසත්‍යතාවය ඉහත සඳහන් කල බ්ලොග් පිටුවේ මා සහ මා දන්නා අය හෝ කරුණු ගැන ඔවුන් කියන දේවල ඇති සත්‍ය-අසත්‍යතාවයට හැමඅතින්ම සමානය.  





මෙම අඩවියේ පළවන ලිපි කොපි කිරීමට හෝ වෙනස් කතෘ නාමයක් යටතේ අන්තැනක පළකිරීමට කිසිම බාධාවක් නැත. අන් ස්ථානවලින් කොපි කර මෙහි පළකරන ලිපි වලට නම් එම කතෘ වරුන්ගේ කොන්දේසි අදාල වේ.