මම නිවැරදිකරුය

ගරු විනිසුරුවරුනි

මා වෙත එල්ලවී ඇති සියළු චෝදනා වලට මම නිර්දෝශී බව ඔප්පු කිරීමටත් එම වරදට වගකිවයුතු වැරදිකරුවන් සමාජයට හෙළිදරව් කිරීමටත් මෙම දිවුරුම් ප්‍රකාශය ඔබ හමුවේ තබමි. බ්ලොග් ලියන්නන් 28 ක් සහ බ්ලොග් නොලියන එහෙත් කියවන අය තුන්දෙනෙක් විසින් ඒ අය කැමති ගීත ගැන පෝස්ට් සහ කමෙන්ට් දැමීමට පටන් ගැනීම කරන කොටගෙන  බටකොල යායට ගිණි තැබීම   මට එල්ලවී ඇති චෝදනාවයි. මේ චෝදනාව මාවෙත එල්ල කිරීම ද්වේශ සහගතව සිදුකරන එකක් බවත් මම ඒවාට කිසිසේත්ම වැරදිකරු නොවන බවත් මම කලේ එක බට කොලයකින් සිගරට් එකක් පත්තු කරගැනීම පමණක් බවත් බට යායට ගිණි තැබීම සිදුකලේ අන් අය බවත් මෙය කියවා අවසාන වන විට ගරු විනිසුරුතුමන්ලාට පැහැදිලි වනු ඇත. 

ගරු කල්‍යාණ මිත්‍ර මැතිතුමා

දවසකට හිට්ස් දෙක තුනක් වදින මගේ බ්ලොගයේ ලියන ලද පෝස්ට් එකෙන් සිදුකලේ මම කැමති ගීත 16 ක් දැමීමත් බ්ලොගය කියවන්නට පැමිණෙන දුසිමකට අඩු කිහිප දෙනාට ඔවුන් කැමති ගීතත් සඳහන් කර පෝස්ට් දමන ලෙස කරන ලද අහිංසක ඉල්ලීමක් පමණමයි. එදිනම හෝ පසුදින නෙළුම්යායේ ශ්‍රී ලංකා පාර්ශවයේ ප්‍රධාන සංවිධායක වූද, බ්ලොග් වසන්තයේ ශ්‍රී ලංකාවේ  නිත්‍ය නියෝජිත වූද, බ්ලොග්කරුවන් ගේ සමාජ සේවා ක්‍රියාවලීන් වල ප්‍රධාන සංවිධායක වූද, පසුපසින් යන්නන් (followers) කෝටි දෙකකට (ගණන් කලේ ගීතා කුමාරසිංහ) ආසන්න ප්‍රමාණයක් සිටින ගරු කල්‍යාණ මිත්‍ර නැමැති ජනප්‍රිය බ්ලොග් කරුවා මගේ පෝස්ට් එකට ලින්ක් එකක් සමඟ පෝස්ට් එක පළ කිරීම මෙම ගින්නට ප්‍රධාන හේතුව බව දිවුරා ප්‍රකාශ කර සිටිමි. මගේ පෝස්ට් එක කියවූ බොහෝ දෙනෙකුද එය කියවා තිබුණේ ගරු කල්‍යාණ මිත්‍ර මැතිතුමාගේ එම පෝස්ට් එක හරහා බව සාක්ෂි සහිතව ඔප්පු කල හැකිය.

ගරු කල්‍යාණ මිත්‍ර මැතිතුමා සිදුකලා යැයි එසේ සාධක සහිතව ඔප්පු කල හැකි මෙම ගිණි තැබීමට ඔහුගේ විදේශ හාම්පුතුන් ලෙස සැලකෙන එක්සත් රාජධානියේ පදිංචි කොලඹ ගමයා විසින් පෝස්ට් එක නෙළුම් යායේ පළ කිරීමෙන්  මෙම අපරාධය තවදුරටත් ව්‍යාප්ත වූ අතර ඔහු හෝ එම රටේ පදිංචි චන්දිම විතාන lankanewsweb  හි ද පළ කිරීම එය තවත් තීව්‍ර කරන්නක් විය.  එම පෝස්ට් එක පළ කිරීමට අමතර ගරු කල්‍යාණ මිත්‍ර විසින් සිතූට සහ හංසිටත් එම ගිණි තැබීම තවත් ව්‍යාප්ත කිරීමට අනුබල දුන් බව ඔහුගේ පෝස්ට් එකේ කමෙන්ට් වලින් ඔප්පු වේ. සිතූද මිනිසුන්ගේ දත් ගලවා අතට දීමේ ජාතික කර්තව්‍ය පසෙකලා පෝස්ට් පලකිරීමෙන් නොනැවතී අන් අයටද එසේ කරන ලෙස අනුබල දුන් බවටද පැහැදිලි සාක්ෂි ඇත.

මෙම ගින්න පැතිරීමට හේතුවත් මට  කිසිම සම්බන්ධයක් නැති එකකි. එකිනෙකාව මරා ගැනීමට මාන බලමින් සිටින ටොයියන් බයියන් වුවත් එකෙක් සිංහල සිංදුවක් කියන්න පටන් ගතහොත් සියළු දේශපාලන වාද භේද ඉවතලා එම ගීතය ගායනා කිරීමට එක් වීම සිදුවන්නේ නොදැනුවත්වමය.  කුමන දේශපාලන දර්ශණයක් විස්වාශ කලත් මරා පාලනයකට හෝ යහපාලනයකට කඩේ ගියත් සිංහලයන් වශයෙන් සිංහල සංගීතයට ඇති දැඬි බැඳීමේ වෙනස් කම් කිසිවක් නැත. එමෙන්ම වයස්ගත බ්ලොග්කරුවනුත්, මැදිවියේ සිටින බ්ලොග් කරුවනුත්, තරුණ බ්ලොග් කරුවනුත්, නව යොවුන් බ්ලොග් කරුවනුත් විවිධ යුග වල ගීත වලට අසීමිත ආසාවක් සහ ඇල්මක් දක්වන්නේ ඔවුන්ගේ ඇති කලාකාමීත්වය සහ සිංහල සංගීතයට ඇති ලැදියාව නිසාය. වයස අනුව අදාල බව වෙනස්වන අන් විෂයයන් මෙන් නොව සංගීතය සම්බන්ධ දෙයක් වයස් බේදයකින් තොරව හැමෝටම පොදු සහ හැඟෙන මාතෘකාවක් වීම සිදුවන්නෙ නිතැතින්මය. එවන් විවිධ වයස් කාණ්ඩ වල සිටින සිංහල බ්ලොග් කරුවන් ඔවුන් කැමති ගී 16 පෝස්ට්  කිරීමට පටන්ගත්තේ  හුදෙක්ම ඔවුන්ගේ රසිකත්වය සහ කලාකාමීත්වය නිසාම මිසක මම  කරන ලද අර්තාපල් ගෙඩියක්  (Solanum tuberosum) නිසා නොවන බව  ඉඳුරාම ප්‍රකාශ කර සිටිමි.  ඔවුන්ට ගීතයට සහ කලාවට එසේ දැඩි ඇල්මක් නොතිබුණා නම් එය සිදු නොවන බවත් කෙනෙක් පෝස්ට් එකක් දැමූ පමණින්ම අන් අය අනුගමනය කිරීමක පූර්වාදර්ශයක් නැති බවත් ගරු විනිසුරුතුමන්ලාට පැහැදිලි වනු ඇත.  

එමෙන්ම ආර්ථික විද්‍යාව ගැන විද්වතුන්, ඇමෙරිකාවේ විද්‍යාත්මක පරීක්ෂණ වල නිරත විද්‍යාඥයින්, දේශීය සහ විදෙස්ගත ඉංජිනේරුවන්, දන්ත වෛද්‍යවරුන් සහ වෛද්‍යවරියන් සහ විවිධ වෘත්තිකයින්ද, විශ්ව විද්‍යාල ශිෂ්‍ය ශිෂ්‍යාවන්ද, ඔවුන් වෙනදා පළ කරන විෂයයන් මොහොතකට පසෙකලා ගීත 16 පළ කිරීමට උත්සුක වූයේද සියයට සියයක්ම සිංහල සංගීතය ගැන ඔවුන්ගේ ඇල්ම සහ රසාඥතාවය නිසා පමණක්ම බව ගරු විනිසුරුතුමන්ලාට පැහැදිලි වනු ඇත.

ඉහත සඳහන් කල වැරදිකරුවන්ට අමතරව දශක ගණනක සිට සිංහල සංගීතය පෝශණය කල සංගීතඥයන්, පද රචකයන් සහ අති දක්ෂ ගායන ශිල්පීන්ද, ඔවුන්ගේ ප්‍රයත්නයන් නිසාම සිංහල සංගීතයට තිලිනවුන  සිත් මන් මත් කරන ගී විශාල සංඛ්‍යාවද තමන්ගේ සිතේ පැල පදියම් වූ  ගීත පෝස්ටු පලකිරීමට බ්ලොග් කරුවන් පෙලඹවීමට කෙලින්ම වගකිව යුතුය.   

අවසන් වශයෙන් තමන් කැමති ගීත 16 ඉදිරිපත් කරමින් සහ සිංහල බ්ලොග් සමාජය තුල බෙදා ගනිමින් පෝස්ට් දැමූ හා තමන් කලින් නොකියවූ බ්ලොග් වලටත් යමින් එකිනෙකාගේ ගීත ගැන අදහස් දැක්වූ පහත නම් සඳහන් කර ඇති බ්ලොග් රචකයන් සහ රචිකාවියනුත්  මෙම  ගිණි තැබීමට අනියමින් සහය හා අනුබල දැක්වූ බවත් පෙන්වීමට පැහැදිලි සාක්ෂි  ඇති බව  ප්‍රකාශ කර සිටිමි. ඔවුන්ගේ නම් සමඟ ලින්ක් දමා තිබෙන්නේ ඔබ තුමන්ලාට ඒ ඒ පෝස්ට් වලට ගොස් නියම වැරදි කරුවන් කවුරුදැයි සැක හැරම දැනගනු පිණිසමය. 

කල්‍යාණ මිත්‍ර, , හංසි,  නිර්මාණි , අටම්පහුර සොමියා සිතූ,  ගස් ලබ්බා, රවී වීරසිංහ,  කොලඹ ගමයා,  පොකුරු වැහි ,  කසුන්, නිම්නයක තනිවී,  සාරස තුමා,  තිලක සිත, ශානි කාව්‍යා,  විචාරක, සිතුවිලි සිත්තටම නැගෙනා කවි පොත,  ප්‍රභාත්,  විභීශණ,  තුශාණි, ඉකොනොමැට්ටා, වැසි දැරිය, කෙන්කියුෂා , උන්මත්තක, කවිඳු, සින්බෑඩ්, ලොකු පුතා, කටුසු හදවත

එම නිසා මෙම ගිණි තැබීම ගැන ඇති චෝදනාවට මම සම්පූර්ණයෙන්ම නිවැරදි කරු බැවින් මා නිදොස් කොට නිදහස් කරන මෙන අයැද සිටිමි.