පොරොන්දුවක් කඩ කිරීම

ගලක් උඩ හිරවුනු ඔරුවක් හබල් ගාන අනුර කුමාර

මට කාලෙකින් පස්සෙ මාලිමාවේ සහෝදරයෙක් හම්බුවුණා. ඒකාලෙ නිතර හම්බු වුනාට දැන් එහෙම මුණ ගැහැන්නෙ නැති එකෙක්. දැන් අනුර කුමාර මහත්තය එහෙම රටේ ප්‍රශ්ණ විසඳන විදිහ ගැන විස්තරයක් කියන්නෙ නැති නිසා මට හිතුන මෙයාගෙන් වත් අහල බලන්න.

මම :- කොහොමද බං කාලෙකින්.?

මාලිමා මාමා :-  හරි බිසී මචං. ඉක්මනට මැතිවරණයක් ඉල්ල ගන්න තමයි ට්‍රයි එක. මේ පාර අපි ගොඩ.

මම :- ඈ බං දැන් උඹල බලයට ආවොත් කොහොමද පෙට්‍රල් ගාණ අඩුකරන්නෙ?

මාලිමා මාමා :- ඒක සුළු දෙයක්නෙ අර රුසියාව ඩොලර් 35 ට බැරල් එකක් දෙන්න කැමතියිනෙ, අපි ඒ ගොල්ලන්ගෙන් ගන්නවා.

මම :- ඇයි බං මේ ආණ්ඩුවට ඕක කරන්න බැරි?

මාලිමා මාමා :-  ඒකනේ බං මේ රනිලයයි පෙට්‍රෝලියම් එකයි පගාව ගන්න තමයි වෙන රටවලින් තෙල් ගන්නෙ.

මම :- ඉතින් ඇයි රුසියාව ඩොලර් 35 ට විකුණන්නෙ, වෙන රටවල ඩොලර් 95 ක් වෙනකොට?

මාලිමා මාමා :- මේකනෙ බං දැන් රුසියාවට තෙල් විකුණගන්න බැහැ. සම්බාධක දාල තියෙන නිසා. ඒ වුණාට අපිට ඒකෙ ප්‍රශ්ණයක් නැහැ. 

මම :- ඉතින් බං සම්බාධක තියෙන රටකින් අපි තෙල් ගත්තම අපිට ප්‍රශ්ණයක් නැත්ද?

මාලිමා මාමා :- උඹ එහෙනං වැඩේ  දැනගෙන මාව අමාරුවේ දාන්න නේද ඔය ප්‍රශ්ණ අහන්නෙ?

මම :- ඇයි එහෙම ගත්තම මොකද වෙන්නේ? දන්නෙ නැති නිසයි අහන්නෙ.

මාලිමා මාමා :- රුසියාවෙන් තෙල් ගත්තම බටහිර රටවලින් සම්බාධක කැඩුව කියල අපෙන් ගන්න බඩු ගන්නේ නැතිවෙනව. එතකොට මහ විසාල ගාණක් ඩොලර් රටට නැතිවෙනව. එතකොට දැන් තරමටවත් කන්න ගේන්න බැරිවෙනවා. හොඳම එක තියෙන්නේ අපේ බඩු බටහිර රටවලට යවන්න බැරි වුණාම මෙහෙ රස්සාවල් නැතිවෙනවා. ඒකත් අපිට හොඳයිනෙ චන්දෙ ගන්න.

මම :- ඉතින් බටහිරට එපානම් අපේ බඩු වෙන රටවලට යවන්න බැරිද?

මාලිමා මාමා :- චීනෙ වගේ රටවල් අපේ බඩු මොනවත් ගන්නෙ නැහැ බං. සියයට 80 ක් විතර අපේ බඩු ගන්නෙ ඇමෙරිකාවයි යුරෝපෙයි. ඒ රටවල් තමයි රුසියාවට සම්බාධක දාල තියෙන්නෙ. රුසියාවත් එක්ක ගනුදෙනු කරන රටවලට ඒ රටවලට බඩු අපනයනය කරන්න බැරි වෙනවා. ඒ කියන්නේ ලංකාවෙන් කිසිම දෙයක් බටහිර රටවල් ගන්නෙ නැහැ. වෙන රටවලට අපෙන් බඩු ගන්න දෙන්නෙත් නැහැ. 

මම :- ඉතින් බං එතකොට ලංකාව ඉවරටම ඉවරයිනෙ?

මාලිමා මාමා :-  ඔව් බං ඒක නිසයි රුසියාවෙන් ගන්නෙ නැත්තෙ. ඒක ඔය අනික් මෝඩ මිනිස්සු දන්නෙ නැහැනෙ. රනිල ඩොලර් හොරා කනව කියල කියන්න හොඳ චාන්ස් එක. ඒකයි අපි කියන්නෙ.

මම :- ඇයි ඉතින් රනිල ඒක නොකියන්නෙ?

මාලිමා මාමා :- ඒ උගේ හැටිනෙ බං. දැන් අපි බටලන්ද ගැන කියවනකොට, ඌ සද්ද නැතුව ඉන්නව. ඌ හැමදාම පැරදුනේ ඕක නිසයි. ඌ හිතන්නෙ මිනිස්සු ඇත්ත දැනගන්න මොලේ තියෙන්න ඕන කියල. මිනිසුන්ට මොලේ තිබ්බ නම් ගෝටාභයට රැවටෙයිද? ඉතින් මුන් කවදාවත් රුසියන් තෙල් ගන්න බැරි හේතුව මිනිසුන්ට කියන්නෙ නැහැ.

 

මම :- එතකොට ඉන්දියාව රුසියන් තෙල් ගන්නේ කොහොමද?

මාලිමා මාමා :- ආ ඉන්දියාව බලවත්නෙ. උන්ට බටහිර රටවල් සම්බාධක දාන්නෙ නැහැ. උන්ගෙ බඩු ගොඩක් ඉන්දියාව ගන්න නිසා ඉන්දියාවට සම්බාධක දාන එකක් උන්ටම පාඩුයි. වෙන එකක් තියා ඊයෙ පෙරේදා ඇමෙරිකාව සම්බාධක තියෙද්දි රුසියාවෙන් තෙල් ගන්න විශේෂ අනුමැතියකුත් ඉන්දියාවට දුන්න.

මම :-  එතකොට උඹල බලයට ආවම රට දුවන්න සල්ලි හොයා ගන්නෙ කොහොමද?

මාලිමා මාමා :- රාජපක්ෂලා හොරකං කරපු සල්ලි අපි රටට ගේනවනෙ. අනුර සහෝදරය ඒව කරයි.

මම :-  එතකොට අර 1989 පිලිපීනෙන් එලවපු මාකෝස් හොරකම් කරපු සල්ලි ආපහු ගත්ත වගේද?

මාලිමා මාමා :- ඔව් ඔව් ඇයි?

මම :-  දැන් මාකෝස් ගිහිල්ල අවුරුදු 31ට මිනිහ හොරකම් කරපු බිලියන ගානෙන් 5% වත් හොයාගෙන නැහැ නේද?

මාලිමා මාමා :-  එහෙම තමයි කියන්නෙ.

මම :-  ඉතින් උඹල කොහොමද රාජපක්ෂ සල්ලි ආයි ගන්නෙ?

මාලිමා මාමා :- අනේ මන්ද බං ඒ වුනාට ඒව ගන්නව කියන එකට මිනිස්සු චූන් වෙන එක අපිට හොඳයිනෙ. අනික හැමෝම හිතන්නෙ අපිට විතරයි ඒ සල්ලි ගේන්න පුළුවන් කියල. ඇත්ත කථාව අපිටත් බෑ කාටත් බෑ.

මම :- මේ ඔක්කොම දැනගෙනද උඹල මිනිසුන්ව නොමඟ අරින්නෙ?

මාලිමා මාමා :- එහෙම තමයි බං දේශපාලනේ කියන්නෙ. දැන් බලපන් අපි ඊයෙ පෙරේද කිව්ව කැමරා ෆෝන් තිබුණ නැති නිසා තමයි 88/89 දී මරපුවට අපිට වැරැද්ද දැම්මෙ කියල. ඒක  කිව්වම ඒකත් මිනිස්සු විස්වාශ කරනව. හිටපන්කො බලන්න අපි තව ටික දවසකින් කියනව සද්ධාතිස්ස හාමුදුරුවො. විජය කුමාරතුංග, ප්‍රේමකීර්ති, සාගරිකා ගෝමස් වගේ අය අපි මැරුවෙ නැහැ උන් සිය දිවිහානි කරගත්ත කියල. අපිට සුවර් ඒකත් මිනිස්සු විස්වාස කරනව කියල.   

මම :- උඹල අවංකයි කියල කියාගෙන බොරුවෙන්නෙ දේශපාලනේ කරන්නෙ?

මාලිමා මාමා :- මේකනෙ මචං අපේ රෝහණ විජේවීර ලොක්ක 1982 චන්දෙදි මුළු චන්ද ලක්ෂ 65 ණ් සියයට 4 ක් වගේ ඒ කියන්නෙ චන්ද 273,000 ක් ගත්ත. අවුරුදු 38 කට පස්සෙ 2020 මුළු චන්ද ලක්ෂ 115 න් අපිට ගන්න පුළුවන් වුනේ චන්ද 446,000 යි ඒ කියන්නෙ 3%. අවුරුදු 38 කට චන්ද 173,000 යි අපිට වැඩි වෙලා තියෙන්නෙ

 ගෝඨා අනාගත්තම තමයි අපිට දැන් ටිකක් රැල්ලක් එන්නෙ. ඒක අපේ දක්ෂකමට වෙන එකක් නෙවෙයි, අනික් වුන් අනාගන්න කොට තමයි අපිට එන්න පුළුවන්. වැරදිලාවත් පෙට්‍රල්, ගෑස් ප්‍රශ්ණ එහෙම හරි ගියොත් අපිට ආයිමත් හුලං. ඒක නිසා මොන බොරුවක් හරි දාල මේ පාර බලේ ගන්න එපැයි. උඹ ඉතින් මේව ගිහිල්ල එක එකාට කියනව එහෙම නෙවෙයි. පොරොන්දු වෙයන් මට එහෙම වෙන වුන්ට කියන්නෙ නැහැ කියල.

මම :- හරි හරි බං මම කාටවත් කියන්නෙ නැහැ කියල පොරොන්දුවෙන්නම්. එතකොට උඹලට වියදමට සල්ලි එන්නෙ කොහෙන්ද?

මාලිමා මාමා :- උඹත් හරි මෝඩයෙක්නෙ. දැන් බලපන් කොරෝනා කාලේ

ඇමරිකන් ලේකම් කෙනෙක් ලංකාවට එනවට අපි විරුද්ධ වුනා නේද?

මම :- ඔව්.

මාලිමා මාමා :- එතකොටම වගේ ආව කොරෝනා පතුරවපු චීන ආණ්ඩුවෙ තුන්වෙනියට අපි විරුද්ධ වුනාද?

මම :- නැහැනෙ

මාලිමා මාමා :- දැන් ඔය එනවයි කියන චීන ඔත්තු බලන නැවට අපි විරුද්ධ වෙනවද?

මම :- නැහැනෙ. ඕ ගොල්ල සපෝට් නෙ.

මාලිමා මාමා :- එතකොටවත් උඹට හිතාගන්න බැරිද අපිට සංවිධානය වෙන්න, රට වටේ මීටිං තියන්න, අපේ අයට ජීවත් වෙන්න සල්ලි එන්නෙ කොහෙන්ද කියල? 

මම :-  ජර්මනියෙන්?

මාලිමා මාමා :- උඹෙ %$#&&%&^%)

මම :- හරි බං තරහ ගන්න එපා, මට තේරුනෙ නැහැ. මම ගිහිල්ල එන්නං.

මම මෙහෙම පොරොන්දු වුනාට බ්ලොග් එකේ ලියන්නෙ නැහැ කියල පොරොන්දු වුනේ නම් නැහැ.

මෙම අඩවියේ පළවන ලිපි කොපි කිරීමට හෝ වෙනස් කතෘ නාමයක් යටතේ අන්තැනක පළකිරීමට කිසිම බාධාවක් නැත. අන් ස්ථානවලින් කොපි කර මෙහි පළකරන ලිපි වලට නම් එම කතෘ වරුන්ගේ කොන්දේසි අදාල වේ.