රැකියාව වගකීම සහ කැක්කුම (passion)

දේවානී ජයතිලක මහත්මිය

කඩොලාන පරිසරයක් රැක ගැණීමට දේශපාලන අධිකාරිය සමඟ ගම්පහ වන ජීවී නිලධාරිණී දේවානී ජයතිලක මහත්මිය  තනිවම සටන් වදින වීඩියෝවේ අන්තර්ගතය ගැන බොහෝ අදහස් ෆේස්බුක් හරහා පළවී ඇත.  මෙතුමිය ඒ ගැන කැක්කුමකින් අවේගශීලීව කථාකිරීමත් අන් බොහෝ රජයේ සේවකයින් දේශපාලන අධිකාරියේ සුවච කීකරු ගැත්තන් වීම ගැන කථා වුනත් මේ වෙනසට හේතුව කුමක් විය හැකිද යන්න ගැන කථා වී තිබුණේ අඩු වශයෙනි.

බටහිර රටවල රජයේ සේවයේ මෙවන් අභීත නිලධාරීන් එම රටවල් ජීවත් වන අය දැක තිබෙන්නට ඉඩ තිබේ. ඊට ප්‍රධානම හේතුව වන්නේ එක් එක් විෂයය පිළිබඳව ඇත්තටම කැක්කුමක් (passion) ඇති අය එම තනතුරු වලට තෝරාගැනීමත් එමෙන්ම එවන් කැක්කුමක් ඇති අය එවන් තනතුරු වලට බැඳීමට ඇති කැමැත්තත් යන හේතු දෙකයි. උදාහරණයකට වෛද්‍ය හෝ හෙද විෂයය හැදෑරීමට තෝරාගන්නේ ඒසඳහාම වූ බුද්ධි පරීක්ෂණයක් සමත්වන සමාජයේ අඩු වරප්‍රසාද සහිත අයට පිහිටවීම පිළිබඳව අත්දැකීම් සහ ඒ ගැන උනන්දුවක් දක්වා ඇති අයයි. එවන් අය වෛද්‍යවරුන් හෝ හෙදියන් වූ විට තමන්ට කැක්කුමක්  ඇති දෙයක් නිසා ලෙඩුන් වෙනුවෙන් කැපවීම සහ ආදරය දැක්වීම උත්සාහයක් හෝ මවාපෑමක් නැතිවම සිදුවේ. 

ගුරුවරුන් බඳවා ගැනීමේදීත් අධ්‍යාපනය සහ දරුවන් ගැන කැක්කුමක්, දැඩි උනන්දුවක් ඇති අයම ඒ සඳහා වන උපාධි හැදෑරීමට තෝරාගැනීම සිදුවේ. විශ්ව විද්‍යාල වලට නොතේරුණ එහෙත් දේශපාලන සම්බන්ධ කම් ඇති අය බඳවාගෙන ඔවුනට විශයයක් උගන්වා ගුරුවරුන් ලෙස සේවයේ යෙදවීමෙන් අධ්‍යාපන විෂයය ගැන කැක්කුක්මක් හෝ දරුවන්   ගැන කැක්කුමක් ඇති අය බිහි නොවේ.

රටේ ආදායමෙන් වැඩිම මුදලක් වියදම් වෙන රජයේ සේවයන් සඳහා බඳවා ගැනීමේ ක්‍රමයේ වෙනසක් තව ශතවර්ශයකට හෝ වෙනවායැයි සිතිය නොහැක.

එහෙත් අහඹු ලෙස විෂයයක් ගැන ඇත්තටම කැක්කුමක් ඇති කෙනෙක් ඒ විෂයටම අදාල රැකියාවක් කිරීමට ලැබීම සිදුවිය හැක්කකි. දේවානි ජයතිලක මහත්මිය එවැන්නියකි. ඒ දෙස බලා අන් සියළුම රාජ්‍ය සේවකයින් එසේ වෙයි යැයි බලාපොරොත්තුවීම නම් මෝඩකමයි. 

පහත වීඩියෝවේ ඇති, අතින් කටින් කුඩා දරුවන් එල්ලාගෙන, බොහෝ විට නිවාඩු දවසක රුක් රෝපනය සහ වන වගා ව්‍යාපෘතියක අය එතුමිය දිරිගන්වන හැටි බලා සිටීමට ලැබීමත් පිනකි.

මෙම අඩවියේ පළවන ලිපි කොපි කිරීමට හෝ වෙනස් කතෘ නාමයක් යටතේ අන්තැනක පළකිරීමට කිසිම බාධාවක් නැත. අන් ස්ථානවලින් කොපි කර මෙහි පළකරන ලිපි වලට නම් එම කතෘ වරුන්ගේ කොන්දේසි අදාල වේ.