දකුණට බර නෙළුම්යාය

දකුණට බර  නෙළුම්යාය සම්මාන උළෙලේ එක් අවස්ථාවක්

නෙළුම්යාය සම්මාන උළෙලේ තිබූ පක්ෂග්‍රාගී බව සහ දුර්වලතා ගැන පෝස්ට් එකක් දාන්න කියල කීප දෙනෙක් කිව්ව නිසා මම දැක්ක දේවල් ගැන කෙටි සටහනක් තියන එක අනාගතේ එවන් සම්මාන උළෙලවල් සංවිධානය කිරීමේදී මඟ හරවා ගැනීමට ප්‍රයෝජනවත්වේවි කියල හිතනවා.

මම දැකපු ප්‍රධානම දුර්වලතාවය තමයි සම්මාන උළෙල පවත්වන්න යොදාගෙන තිබ්බ ස්ථානය. වෝටර්ස් එජ් එකේ ශාලා ගොඩනැඟිල්ලට ඇතුළු වෙන තැනින්ම වමට හැරිල ටික දුරක් ගියාම තිබුණ සෝපාන වලින් තුන්වන තට්ටුවට ගියාම දකුණට හැරිල ඒ එක්කම වමට ආයිමත් හැරිල ශාලාවට ඇතුළු වෙන්න ආයිමත් දකුණට හැරෙන්න වුණා. බ්ලොග් කාරයන්ව මේ විදිහට රස්තියාදු නොකර දොරෙන් ඇතුල් වෙනකොටම ශාලාවට යන්න තියෙන තැනක් තෝරගත්තනම් හැමෝටම පහසු වෙන්න තිබ්බ.  අනික බ්ලොග් කාරයෝ කියන්න වමට දකුණට හැරෙන කට්ටියක් නෙමෙයි කියන එක ගැන සංවිධායකයින්ට තේරුම් නොයාම නම් පුදුමයි.

ඇතුලට ගිහිල්ල ඉඳගත්තම මම දැකපු අනික් වැරැද්ද තමයි වේදිකාව තනල තිබුණ විදිහ. වේදිකාව නූල් දෙකක් විතර දකුණු පැත්තට බරවෙන්න හදල තිබුණ බව හොඳටම පෙණුනා. ඒ එක්කම සිංහල නිවේදකයෝ සහ දේශණ පවත්වපු ප්‍රධාන ලෙක්ටර්න් එක තිබුණෙත් දකුණු පැත්තෙ. වම් පැත්තෙ තිබුණෙ පර්වර්ථකයන් පාවිච්චි කරපු පොඩි ලෙක්ටර්න් එකක්. ප්‍රධාන ලෙක්ටර්න් එක දකුණෙන් තැබීමත් වේදිකාව දකුණට බරව හැදීමත් යන දෙකම  සවිඥ්ඥානාත්මකව බ්ලොග් කරුවන් ගේ 'දෘෂ්ඨිය' දක්ෂිණාංශික පැත්තට බර කරන්න කරපු මානසික උපක්‍රමයක් කියල ඕනම කෙනෙකුට වැටහෙනවා. උළෙලට අනුග්‍රාහකයන් හිටිය කියල කිව්වට මේවට ඇත්තටම වියදම් කරන්නෙ අන්ත දක්ෂිණාංශික යූ එන් පිය කියල මේකෙන් ඔප්පු වෙනව.  

මැතිවරණ කොමිසමේ සභාපති තුමා කථාව පවත්වන්න යනකොට සම්මාන දෙන්න යනකොට කළිසම අත්දෙකෙන් උඩට උස්සමින් ගිය බව කවුරුත් දකින්න ඇති. අඩුම ගානෙ ආරාධිත අමුත්තන්ටවත් බඳ පටියක් පැලඳගෙන එන්න කියල දන්වන්න තරම් වත් සංවිධායකයින්ට වුවමනාවක් තිබිල නැහැ. මේවගේ දේවල් ගැන සැලකිළිමත් නොවීම බ්ලොග් කරුවන්ට කරන අවමානයක්.

උළෙලේ සංවිධානය event coordinating කොම්පැණියකට දීල තිබුණත් ඔවුන්ගේ සංවිධානය තිබුණෙ ඉතාම පහත් මට්ටමක. ඒකට හොඳම උදාහරණය තමයි තේ සහ කෝපි ලබා ගැනීමට තිබුණු ක්‍රමය. තේ සහ කෝපි එක පැත්තකත් ඒවට සීනි වෙන තැනකත් තිබ්බ බව තේ බීපු අයට මතක ඇති. තේක හදාගන්න අවශ්‍ය කරන දේවල් ඔක්කොම එක පැත්තේ තියන්න ඕන කියන එකවත් මහ ලොකු event coordinators ලට තේරුමක් තිබිල නැහැ.

ස්වාධීනයි කියල පෙන්නන්න ධර්මිශ්ඨ සමාජයක් වගේ නාට්‍ය ඇතුලත් කරල ඒක සහභාගී වෙන අයට බලන්න බැරිවෙන්න ඒක පටන් ගන්නකොටම කෑම සපයපු එකත් මේකට හොඳ උදාහරණයක්. අනික ඔය සැන්විච් කෑල්ලක් වගේ එකක් තිබුණනන් ඒකත් අරගෙන ඇතුලට ඇවිත් නාට්‍ය බලයි කියල තමයි ඔය හොඳ පේස්ට්‍රීස් ජාති එහෙම එක්ක කෑම දුන්නෙ කියන එකතමයි මට හිතුණෙ. මේ වගේ යටිකූට්ටු කුමන්ත්‍රණ වලින් සම්මාන උළෙල පිරිල තිබුණ කිව්වොත් ඒක බොරුවක් නෙවෙයි. 

බ්ලොග්කරුවන් කිහිප දෙනෙක්වත් බ්ලොග් ලෝකයෙන් ඉවත් කරන්න සංවිධානාත්මක සැලැස්මක් නෙළුම්යාය සංවිධාකයන් ක්‍රියාත්මක කලා කියල මට හිතෙනව. ඒකට හොඳම උදාහරණය තමයි සීනි අධිකව තියෙන ඊක්ලෙයාර්ස් වැනි ආහාර දෙන බව සහ ඒ නිසා දියවැඩියාව තියෙන අයට ඒවට බොන පෙති එහෙම අරගෙන එන්න කියල කළින් නොදැන්වීම. කැලේ පිපුණ මල් ලියන  ඔය උඩ පින්තූරෙ ඉන්න වත්සලා මේ ඊක්ලෙයාර්ස් කීපයක්ම රස වින්ඳ කියල ලියා තිබුණ. කළින් දැනුම් දීමකින් තොරව මේවගේ අධි සීනි කෑම බ්ලොග් කරුවන්ට කවා ඔවුන්ට දියවැඩියාව සාදවා බ්ලොග් ලෝකයෙන් අයින් කිරීම වැනි සැලැස්මක් ක්‍රියාත්මක වුණා කියන එක සාධාරණ සැකයක්.  

මම මේ ලිව්වෙ සම්මාන උළෙලෙ එළිපිටම පෙනෙන්න තිබුණ ප්‍රධානම දුර්වලතා ටික විතරයි. මේවගේ පක්ෂග්‍රාහී ඒවගේම කුමන්ත්‍රණකාරී සහ සම්මාන උළෙලවල් සංවිධානය කරන එක නවත්වල ස්වාධීන සම්මාන උලෙළවන් මීට වඩා සංවිධානාත්මකව පවත්වන්න බැරිනම් අපිටත් නෙළුම්යාය සම්මාන උළෙලට සමගාමීව පවත්වන නෙළුම්යාය වර්ජකයින්ගේ බොන පාටියට යන්න සිද්ධ වෙන බව සංවිධායකයින්ට මතක් කරන්න ඕන.   


සහන් කසීර වික්‍රමසිංහ දුටු මේ අඩුපාඩුත් ලිපියට එකතුකරමි.

1. හැලප , ලැවරියා වගේ දේශීය කෑමක් දෙන්නේ නැතිව ටාර්ට් , ඉක්ලෙයාර්ස් වගේ නොදන්නා කෑම තිබුණ නිසා අපි පරාධීන වුණා. මොකද සයිබර් එකෙන් ඇමරිකාවේ බැලස්ටික් මිසයිල වලටත් ඇටෑක් කරන අපිට අර පුංචි පැංචි වේටර්ලා ට පවා සෙකන්ඩ් වෙන්න වුණා. " අන්න අරකෙන් එකක් දාන්ට මල්ලි" කිව්වාම ඌ මං දිහා බලපු කැත !! චීයා පුතේ ....

2. වේදිකාව උඩ හිටිය සුමිත් කළණසිරි ගේ පෙනුම ත්‍රස්තවාදියෙක්ගේ වගේ. එතෙනින්ම පේනවා මේ ආණ්ඩුව යටතේ ඊලම යළි පිහිටුවන්න ආධාර දෙන බව. ඇයි බැරි වුණේ සෞම්‍ය පෙනුමක් තියෙන ඈයෙක්ව හිටවන්න ? එහෙමත් නැත්නම් ඔච්චර වියදම් කරපු එන්.ජී.ඕ කාරයින්ට බෑ රුපියල් දාහක් දීලා ඌට පපායා පේෂල් එකක් දාන්ට ? අනේ මේ !!

3. ඉවෙන්ට් මැනේජර් ගේ හැට්ටේ ස්ලීව්ලස්. ඔය එන්නේ රනිල් ගේ කුරුඳුවත්තේ සංස්කෘතිය. නියම සිංහල ගෑණු කවද්ද ස්ලීව්ලස් හැට්ට ඇන්දේ ? ඒ කාලේ රෙද්ද ඇන්දේ නැතත් චීත්තේ තිබ්බා නීට් එකට - හයි නෙක් දාලා එහෙම - හැඩ... ට

4. මොකටද සොක්‍රටීස් පෙන්නුවේ ? ඇයි අපිව බටහිරට ගැති කරන්නේ ? අපිට තිබ්බ ජසයා හා ලෙන්චිනා පෙන්නන්න ? එහෙමත් නැත්නම් වස බොන එකක් පෙන්නන්න ඔය තරමට ඕනෙම නම් - අපිට ඉන්නවා නන්දා මාලිනී. මිදි යුෂ යැයි රැවටී හලාහල - විෂ බිව්වේ ඇයි මා ........

5. නිවේදිකාව ඇඳන් හිටිය ඇඳුම ස්වෛරී චින්තනයට ගැලපෙන්නේ නෑ. එයාට තිබ්බා අශෝකා වනමලී වගේ ඔසරියක් අඳින්න. දැක්කද ඇඳපු ඇඳුම ? කොණ්ඩේ හදන්න ගිය ගමං සැලූන් එකෙන් පොරෝපු රෙද්ද පිටින් ආවේ. ඕවා හෙණ අඩුපාඩු

6. නිවේදකයාගේ නිකටේ උපන් ලපයක් තිබ්බා . මොකක්ද අප්පා නිධානය ෆිල්ම් එක වගේ නේ ? මුංට නිකැළල් නිවේදකයෙක් හොයා ගන්න බැරි වුණාද ? අපිට දුන්නා නම් අපි කරන්නේ ඔහොම නෙමෙයි.