ට්‍රම්ප් තුමා සමඟ නැගිටිමු

ට්‍රම්ප් මහතාගේ හිස පීරිමේ විලාසිතාව අනුගමනය කිරීමට උත්සාහ කරන අයෙක්

ගිය සතියේ පැවැත්වුණ ඇමෙරිකානු ජනාධිපතිවරණයේදී ඩොනල්ඩ් ට්‍රම්ප් මහතාගේ ජයග්‍රහණය ගැන විවිධ අර්ථකථන සහ හුරේ දැමීම් පුවත්පත්වල, රූපවාහිනී නාලිකා තුල මෙන්ම බ්ලොග් තුලත් දක්නට ලැබුණා. බ්‍රෙක්සිට් ජයග්‍රහණය සහ මෙම ජනාධිපතිවරණයේ ප්‍රතිඵලය හේතුවක් ඇතිව හෝ නැතිව රාජපක්ෂවාදීන් අමන්දානන්දයට පත්වෙලා. මොවුන් ට්‍රම්ප් මහතාගේ ගේ ජයග්‍රහණය අනාගත රාජපක්ෂ ජයග්‍රහණයකට සමාන කරන්නේ ඇයිද යන්න නම් මට තේරෙන්නේ නැහැ. ඒ පහත දැක්වෙන හේතු නිසා. 

ට්‍රම්ප් යනු වෘත්තීය දේශපාලඥයෙක් නොවේ. ඔහු ව්‍යාපාරිකයෙක්. එක්තරා අන්දමකින් ව්‍යාපාරයක් පරිපාලනය කිරීම රටක් පරිපාලනය කිරීමට සමානයි. වියදම් අඩුකිරීම, ක්‍රියා දාම කාර්‍යක්ෂම කිරීම, එක් එක් අංශ වල සහ සමස්තයටම ලඟා විය යුතු ඉලක්ක කලින් තීරණය කර ඒවා කරා ලඟා වීමට සම්පත් මෙහෙයවීම, හදිසි අවස්ථාවලට මුහුණ දීම වැනි හැකියාවන් රටක් පාලනයේදී සාර්ථක නායකත්වයක් දීමට අවශ්‍යම දෙයක්.

පසුගිය කාලයේ රටෙන් සොරකම් කල මුදල්වලින් මිලදී ගත් ව්‍යාපාර සහ වත්කම් තිබුණත් රාජපක්ෂ පවුලේ දේශපාලනයට සම්බන්ධ කිසිවෙක් ව්‍යාපාරික ක්ෂේත්‍රයේ සිටිනවා හෝ සිට ඇත්දැයි මම දන්නේ නැහැ. චමල් හිටපු පොලිස් නිලධාරියෙක්, ගෝඨාභය හිටපු  හමුදා නිලධාරියෙක්, බැසිල්ට වෘත්තියක් තිබුණාදැයි දන්නේ නැහැ. මහින්ද, නාමල්, යෝශිත, අනික් සහෝදරයා ඔවුන්ගේ ක්ශෙත්‍ර වලට ආවේ දේශපාලන අනුහසින් හෙවත් සාමාන්‍ය ක්‍රමයට පිටින්. 

ඇමෙරිකාව දශක ගණනක් පවත්වාගෙන ආ වෙලඳ පොල ආර්ථික ක්‍රමයේ සමහර අංග රටේ වාසියට වෙනස් කරන බවට ඩොනල්ඩ් ට්‍රම්ප් පොරොන්දු වුණා. එම රටේ රැකියා උත්පාදනය, සෞඛ්‍ය ක්‍රමය වෙනස් කිරීම, විදේශයන්හී ප්‍රශ්ණ වලට අතපෙවීම අඩු කිරීම හෝ නැතිකිරීම,  සීතල යුද්ධයේ සතුරු පාර්ශව කෙරෙහි දක්වන ආකල්ප වෙනස්කිරීම ආදී  දේවලුත් ඔහුගේ ප්‍රතිපත්ති ක්‍රම වල  තිබෙනවා. 

රාජපක්ෂ වරුන් පසුගිය දශකයේ කල කී දේවල් සමඟ මේ කිසිත් ගැලපෙන්නේ නැහැ. ආසියාවේ අච්චාරුව ආදී වචන සමඟ සෙල්ලම් කලත් ඔවුන්ට කිසිම දෙයක් ගැන කිසිම දර්ශණයක් හෝ සැලසුමක් තිබුණේ නැහැ. ලක්ෂ 7 ක් රජයේ සේවයට බඳවා ගැනීමට දර්ශණයක් අවශ්‍ය නැහැ. අවශ්‍ය දර්ශණයක් නොතිබීම පමණයි. රජයේ රෝහල් වල ගෙවන වාට්ටු ඇතිකිරීම වැනි දේවල් මේ අයවැයෙන් යෝජනා වී තිබුණත් පසුගිය රජයට එතෙක් පවත්වාගෙන ආ සෞඛ්‍ය සේවය කාර්‍යක්ෂම කිරීමට, ගුණාත්මක බාවය වැඩි කිරීමට හෝ අන් කවර දෙයක් ගැනවත් දර්ශණයක් තිබුණේ නැහැ. අප රටේ පැවැත්මට විවිධ ආකාරයෙන් අත පොවා ඇති සහ අනාගතයේදීත් විවිධ බලපෑම් කල හැකි ඉන්දියාව තුලනය කිරීමට ඔවුන් කිසිම උත්සාහයක් ගත්තේ නැහැ. ඔවුනට පෞද්ගලිකව වාසි සහගතවූ චීනයේ ව්‍යාප්තවාදයට පහසුකම් සලසන්නෙකු  පමණක් වීමට දේශපාලන ඥාණයක් හෝ විදේශ ප්‍රතිපත්තිය ගැන දර්ශණයක් ඇත්ව ක්‍රියා කිරීමක් නෙවෙයි. ඒ අනුව ට්‍රම්ප් මහතාගේ රැකියා, සෞඛ්‍ය, විදේශ ප්‍රතිපත්ති ගැන ඇති අවබෝධය සහ දර්ශණය රාජපක්ෂ වරුන්ට තිබුණේ නැතිබව පැහැදිලියි.

රටේ රැකියා ප්‍රමාණයට බලපාන ආර්ථික එකඟතා නැවත සලකා බැලීමට ට්‍රම්ප් මහතාගේ පොරොන්දුව හා සසඳන කල ඇත්තේ රටේ රැකියා ප්‍රමාණය දීර්ඝ කාලීනව විශාල වශයෙන් අඩුකර රාජපක්ෂවරුන්ගේ උද්දච්ච කම නිසා පමණක්ම අහිමි කරගත් ජී.එස්.පී ප්ලස් සහනයයි.

ට්‍රම්ප් මහතා මුස්ලිම් විරෝධී ආකල්ප ඇති අයෙක්. එය මැතිවරණේදී ඔහු පැහැදිලිවම ප්‍රකාශ කලා. ඔහුගේ එම විරෝධයට හේතු වූයේ මුස්ලිම් සම්භවයක් ඇති අය සිදු කල ලෝක වෙලඳ මධ්‍යස්ථාන ප්‍රහාරය සහ අනිකුත් ප්‍රහාර සහ ISIS සංවිධානයේ  කටයුතු. මෙය හා සංසන්දනය කරන කල කෙලින්ම රජය හා ගැටුමකට මුස්ලිම් වරු ලංකාවේ ඉදිරිපත්වී නැහැ. එවන් ගැටුමක් ඇතිකර ගත්තේ දමිල බෙදුම්වාදීන් පමණයි. මුස්ලිම් වරුන් ලෝකය පුරා ගෙනයන ව්‍යාප්තවාදයට ලංකාවත් ගොදුරුවී තිබීම සත්‍යයක් වුවත් රාජපක්ෂවරුන් ගේ යටි අරමුණ වූයේ ඒ සම්බන්ධයෙන් යමක් කිරීමට  නොවේ. ඔහුට හෝ පවුලට ලාභයක් වනවා නම් රටට හෙණ ගැහුවත් ඔහුට ප්‍රශ්ණයක් වුණේ නැහැ. ශ්‍රීපාද අඩවියට ආසන්න ප්‍රදේශයක ව්‍යාපාරයක් ආරම්භ කිරීමට ඉඩම් දී ඇත්තේ ඔහුගේ පාලන කාලයේදී බව හෙළිවීමත්, විල්පත්තුවේ මුස්ලිම් ජනාවාස ඇතිකිරීම ආරම්භ වී ඇත්තේ එම කාලයේදී වීමත් මෙහිදී විෂේශයි. රාජපක්ෂවරුන්ගේ මුස්ලිම් විරෝධය නානසාර වැනි සිවුරු පොරවාගත් අය ලවා ආගම්වාදයක් පතුරා සිංහල ඡන්ද ලබා ගැනීමේ ක්‍රියාවලියක් පමණයි.

දශක තුනක් රටට ප්‍රශ්ණයක් වූ යුද්ධය නිම කිරීමට දර්ශණයක් නොතිබුණත් තම ආර්ත්මාර්ථකාමී අරමුණු නිසා හෝ එය වීම නම් රටට යහපතක් වුණා. එහෙත් දශක නමයක ප්‍රශ්ණයක් වූ ලංකාව බෙදා වෙනම දමිල රාජ්‍යක් සැදීමේ ව්‍යාපෘතියට ඔහුගේ ආර්ත්මාර්ථකාමය නිසා වාසි වුණා. පසුගිය දශක නමයේම බෙදුම්වාදීන් ගේ චෝදනා සහ රජය ඒවා ප්‍රතික්ෂේප  කිරීම් සහ පැහැදිලි කිරීම් වලට සීමා වී තිබූ වාර්ථා වලට අනාගතයේ කවදා හෝ පාවිච්චි කල හැකි එක්සත් ජාතීන් ගේ සංවිධානයේ අංශයකින් කෙරුණු පරීක්ෂණ වාර්ථාවක් ඇතිවීම එකක්. රජය වෙනස් වීම නිසා එහි සැර බාලවී තිබුණත් එසේ නොවුනානම් තව අවුරුදු 50 කින් හෝ එම කාලයේදී ඇත්තටම වූ දෙය නොදන්නා අයට ලොව පිළිගත් තුන්වන පාර්ශවයකින් සම්පාදනය වූ මෙම එ.ජා වාර්ථාව කඩා දැමීමට අපහසු සාක්ෂියක් වීමට තිබුණා. ලෝකයේ විවිධ අංශ, රජයයන්, සාමාන්‍ය මහජනයා, ඔවුන්ගේ මතයට නම්මවා ගැනීමට එම 'ස්වාධීන' ලෙස පෙනෙන වාර්ථාව දශක සහ ශත වර්ශ ගණනක් යොදා ගැනීමට ඉඩ තිබුණා. අභ්‍යන්තර පරීක්ෂණයක් කරන ලෙස ඉල්ලීම නොසලකා හැර එම ඉල්ලීම සිංහල ජනයාගේ චන්ද ගැනීමට ඇමක් ලෙස පමණක් යොදා ගැනීම, ඒ වෙනුවට පත්කල එල්.එල්.ආර්.සී කොමිසමේ නිර්දේශ ක්‍රියාත්මක නොකිරීම ආදිය මෙම වාර්ථාව ඇතිවීමට එකම හේතුවයි. ඔහුම පත්කල උගත්පාඩම් සහ සංහිඳියා කොමිසමේ රෙකමදාරු කල දේවල් ක්‍රියාත්මක කිරීමෙන් පමණක් වලක්වා ගත හැකිවූ රට බෙදීමට මුල්විය හැකි එක්සත් ජාතීන්ගේ සංවිධාන වල ක්‍රියා කාරී වීම් වෙන්නට ඉඩදී ඒවා මැතිවරණ දිනීමට පමණක් යොදාගත් කෙනෙකු ට්‍රම්ප් මහතා වැනි තම රට සහ ජාතිය ගැන හැඟීමක් හෝ දර්ශණයක් තිබුන අයෙක් ලෙස පෙන්වීමට කිසිසේත්ම බැහැ. 

2003 දී සිදුවූ dafur අර්බුධය මුල් කරගෙන එ.ජා මානව හිමිකම් කොමිසමෙ පරීක්ෂණ හරහා වෙන්වී වෙනම රටක් වූ දකුණු සුඩානය ඇතිවීමට බලපෑ එ.ජා පරීක්ෂණ, යුධ අපරාධ චෝදනා, බෙදුම්වාදීන්ට තිබූ බටහිර රටවල සහය ආදිය ඒ අයුරින්ම ඇතිවන්නට සහ වැඩෙන්නට  ඉඩදී රාජපක්ෂ වරුන් බලා සිටීම ශ්‍රී ලංකාවේ සහ සිංහල ජාතියේ හතුරෙක්ගෙන් පමණක් බලාපොරොත්තුවිය හැකි ක්‍රියාවන්ය. 2015 දී සිදුවූ වෙනස නොවන්නට එම මාර්තු මාසයේ පැවැත්වූ එ.ජා මානව හිමිකම් කොමිසමට ඉදිරිපත්වන්නට තිබූ වාර්ථාවෙන් පටන්ගෙන  ඉදිරි අවුරුදු 10 කින්, 30 කින්, හෝ 50 කින් හෝ රට දෙකඩ වීමක් කරා ගමන් ආරම්භ වීමට තිබුණු බව නොරහසකි. නව රජය පත්වීමෙන් බටහිර රටවල සහය ශ්‍රී ලංකාවට ලබාගෙන එම බෙදුම්වාදීන් අතරමං කිරීම, එ.ජා මානව හිමිකම් කොමිසමේ වාර්ථාව හානි අඩුම වාර්ථාවක් කිරීම සහ එම වාර්ථාව හරහා බෙදුම්වාදීන් බලාපොරොත්තුවූ ආර්ථික සම්භාධක, සුඩානයේ මෙන්  ජනමත විචාරණ ආදිය ඇතිවීමේ අවදානම නැත්තටම නැතිකිරීම නොවන්නට අද රට පැවතීමට ඉඩ තිබුණේ යුද්ධය අවසන නොවී තිබුණානම් වඩා හොඳ යැයි අපට හිතන්නට වන තත්ත්වයකය.

2005 ජනාධිපතිවරණයට ඉදිරිපත්වීමටත් පෙරම ජීවිත සහ වාසස්ථාන  අහිමිවූවන්ට ලැබුණු සහන මුදල් හොරා කෑමට දීන උත්සාහයක් ගත් සහ රටේ හමුදා සහ සිවිල් වැසියන් ඝාතනය කරමින් සිටි ත්‍රස්තවාදීන්ට මුදල් දී කල  ඡන්ද මගඩියකින් බලය හොරාගත් රාජපක්ෂ වරුන්ගේ  හැසිරීම සමඟ සසඳන කල ස්වෝත්සාහයයෙන් ධනවතකු වූ ට්‍රම්ප් මහතා රටේ ඔහු දකින රටේ ප්‍රශ්ණ විසඳීමට විවිධ චෝදනා, අපහාස කිරීම් වලට දොරටු විවෘත කරවා ගණිමින් ඉදිරියට පැමිණීම සහ ජයග්‍රහණය කිරීම එකිනෙකට සංසන්දනය  කල නොහැකි දෙකකි. 

සාරාංශය වන්නේ ට්‍රම්ප් මහතා ගේ මුස්ලිම් විරෝධය සහ ජාතිකවාදී අදහස් වලට හේතුව එම කරුණු ඇමෙරිකාවේ ආරක්ෂාව සහ ඇමෙරිකානුවන්ගේ  රැකියා රැකගැනීම සඳහා බවත්, රාජපක්ෂ වරුන්ගේ මුස්ලිම් විරෝධය හා බොරු ජාතිකත්වය සිංහල ජනයා මුලා කර බලය රැකගැනීම/ නැවත ලබා ගැනීම සඳාහාම පමණක් බවත් යන කරුණයි.

ට්‍රම්ප් මහතාගේ ජයග්‍රහණයෙන් ව්‍යාපාරික හෝ අනික් අංශ වලින් ජයගත් පහසුකම් සහ වැටුප්/විශ්‍රාම වැටුප් ප්‍රතික්ෂේප කරන අධ්‍යාපනය, සෞඛ්‍ය, ණය බර, දුප්පත්කම ආදී දේවල් නව දැක්මකින් විසඳීමට උත්සාහ කල හැකි අය දේශපාලනය පැමිණීමට උත්ප්‍රේරකයක් වුවහොත් නම් ඇත්තෙන්ම සතුටුවිය හැකියි.