පාලම නම් එපා

ඉන්දියාව ලංකාව යාකරල පාලමක් දාන්න යෝජනා කරල තියෙනව කියල උඹලා දන්නවා ඇතිනේ. පොඩ්ඩක් ඉක්මනට හිතල බලාපල්ල මේකෙන් වෙන්න යන විනාසේ. 

ඔය පාලම දැම්මොත් ඔය වෑන් හයර් කරගෙන යාපනේ ගිහින් එන උන් ඊට පස්සෙ වෑන් වලින් මෝටර් සයිකල් වලින් වියට්නාමයට, බුරුමයට, පකිස්ථානයට විතරක් නෙමෙයි ඔය ස්වීඩන් රටට, ෆින්ලන්තයට, ස්පාඥ්ඥයට, ජර්මනියට උනත් යයි. එතකොට ලොකු ගණන් ගෙවල රට රටවල් වලට ප්ලේන් එකේ යන අපිට තියෙන තත්ත්වෙ හෑල්ලු වෙනවනෙ. බලාගෙන යනකොට ඔය ඇමෙරිකාවටයි, ජපානයටටයි ඔස්ට්‍රේලියාවටයි ඇරුනම ඔය අනික් හැම රටකටම වගේ රෝද හතරෙන් එහෙම නැත්තං කෝච්චියේ ගිහින් හරි යන්න පුලුවන් වෙන එක නම් එච්චර හොඳ දෙයක් නෙමෙයි.

ඔය දැන් කීප දෙනෙක් දස දහස් ගණන් ගෙවල දඹදිව වන්දනාවේ ගිහිල්ල ආවම බලන්න එපෑයේ උන්ගෙ තියෙන උජාරුව. කිසි වැඩකට නැති පාළමක් දාල දහ දාස් ගණන් ගෙවන්න බැරි උනුත් වෑන් කබලකින් දහ දොලොස් දෙනා හැම පෝයකටම දඹදිව ගිහින් එන්න පටන් ගත්තොත් එහෙම පිටරට ගියෙ නැති එකෙක් හොයාගන්න බැරිවෙයි. එතකොට අපේ පොල් ගහකට හරි අරින්න කෙනෙක් ඉතුරුවෙයිද? අනික ඉන්දියාවට එන සංචාරකයොන් ගෙන් සියයට එකක්වත් දැන් ලංකාවට නොඑන එකේ ව්‍යාපාරිකයො ඉන්දියාවයි ලංකාවයි එකට මාකට් කරල එහාට එන උන් පාරවල් දිගේ හරි කෝච්චියේ හරි මෙහාට ගෙන්න ගත්තොත් උතුර පැත්ත දියුණු උනොත් දකුණෙ අපිට මොකද වෙන්නේ. අනුරාධපුරට සීගිරියට එන එවුනුත් පාර දිගේ ආවොත් ඒ පැති දියුණු වෙන්න තියෙන ඉඩ වැඩියි. මේක කොහොමටවත් වෙන්න දෙන්න හොඳ නැහැ කියල තේරෙනවනේ.

අනික ඉන්දියාවට වඩා ලංකාවේ නිශ්පාදන කර්මාන්ත දාන්න ලොකු කොම්පැණි කැමති උනාට ලංකාවේ හදන දේවල් පිටරට අරින්න පුලුවන් නැව් හරි ප්ලේන් වලින් විතරක් නිසා වියදම වැඩියි කියලනෙ උන් ඒව මෙහෙ දාන්නෙ නැත්තෙ. අනික ලංකාවේ ලෝකල් මාකට් එක පුංචි වැඩියි උන්ට බේසික් වොලියුම්ස් දෙන්න. ඔය පාලම නිසා දකුණු ඉන්දියාව වගේ පැතිත් ලෝකල් මාකට් එක වගේ වෙනවනේ. ඔය ලොකු කොම්පැණි මෙහෙ ෆැක්ටරි දාල ඔය රස්සාවල් නැති එව්වො රස්සාවල් අරගෙන උඩ යනකොට අපිට වෙන්නෙ මොකද? 




ඔය ගාමන්ට් ඉන්ඩස්ට්‍රි එකට එහෙම් ඕන අමුද්‍රව්‍ය එහෙම ඉන්දියාවෙන් චීනෙන් කෝච්චියේ හරි ට්‍රක් වල ලාබෙට ආවොත් අපිට ආයිමත් ඉන්දියාව බංගල දේශය වගේ රටවල් එක්ක තරඟ කරන්න පුළුවන් වෙයි. එතකොට ඔය සද්දෙ වහල ඉන්න මෙන්ඩල වගේ ගාමන්ට් ඉන්ඩස්ට්‍රි එකේ කට්ටිය එහෙම තවත් ලොකු උන් වෙයි. බොරුනම් බලපන් කමෙන්ට් කියවලා මෙන්ඩ මේ පාලම ගැන දැනගෙන දැම්ම අපිව නැතිකරන්නයි කථාව. ඌ පාලම ආවම ලැම්බ්‍රොගිනි අරගෙන අපේ කාර් වල හුලං අරිනවලු. අනික පොඩ්ඩක් හිතල බලපන් ඉන්දියාවේ මරුති කාර් එහෙම පාලම හරහා අවොත් කොච්චර ලාභ වෙනවද? එතකොට පොල් කඩන එවුනුත් කාර් ගන්න බලයි උඹල අපේ තත්ත්වේ ඉවරෙටම ඉවරයි.

අද මේ කොලඹ දියුණුවෙලා තියෙන්නේ වරායයි එයාපෝට් එකයි මේ පැත්තේ තියෙන නිසානෙ. නැත්තං කිසිම ලබ්බක් නැති මීගමුවට සංචාරකයො එන්නෙ මොකටද ?  ඉන්දියාවෙ ඉන්න ඔය තරමක් සල්ලි කාර උදවිය තමන්ගෙ රටේ  එක එක ප්‍රාන්ත වල සංචාරය කොරනවලු. උන්ගෙ සංචාරක කර්මාන්තේ භාගෙට භාගයක් තියෙන්නෙ රට ඇතුලෙ වෙන සංචාර නිසාලු. නිකමට හිතපල්ල උන් පාලම නිසා ලංකාවටත් එන්න පටන් ගත්තොත් ඔය දැනට වේලි වේලි ඉන්න උන්ට රස්සාවල් ලැබිල බිස්නස් කොරල එහෙම දැන් පොඩියට ඉන්න උන් දියුණු උනාම වෙන්න යන විනාසේ තේරුම් ගනිල්ලා.  

ඔය පාලම හදන්න යන්නේ තනිකර ඉන්දියාවේ වියදමින්ලු. කිසිම වියදමක් නැතුව ලංකාවට ලෝකෙ ජනගහණයෙන් සියයට හැත්තෑ පහකට වඩා ඉන්න ආසියාවටයි, රුසියාවටයි, යුරෝපෙටයි, ආසියාන් කලාපෙටයි රට ගොඩබිමින් මූට්ටු කලාම මේ රට දියුණු උනොත් දැන් මේ ලොක්කො වගේ ඉන්න අපිට තව ටිකක් කල් යනකොට තැනක් තියෙයිද? අනික රට දියුණු උනාම ඔය දැන් පිටරට ඉන්න රවී වීරසිංහලා , රසිකලොජිස්ට්ලා, පොඩි කුමාරිහාමිලා, අජිත් ධර්මකීර්තිලා, හැලපෙලා වගේ වැඩ කාරයෝ ආපහු ලංකාවට ආවහම අපි වගේ වැඩ බැරුවත් ශේප් එකේ ඉන්න උන්ට යන කළ දසාව මොකද්ද?

කොහොම හරි මේ පාලම දාන එක වළක්වන්න මම හොඳ බොරු ටිකක් ගොතල තියෙනව. විමල් වීරවංශ වගේ උත්තමයෙක් අල්ලගෙන රට වටේ රැස්වීම් තිබ්බල හරි මේක වලක්ව නොගත්තොත් අපේ නම්බුකාර ජීවිතේ ඉවරෙටම ඉවරයි. උඹලත් පුළුවන් නම් මේ බොරු ටික කියවල ප්‍රචාරය කොරපල්ල තත්ත්වෙ තියාගන්න ඕනනම්.  

ඔය ඉන්දියන් කාරයෝ මෙහෙ ඇවිල්ල අපේ ගෑණු බැඳගෙන පුරවැසිකම ගත්තොත් සිංහල ජාතිය සුළු ජාතියක් වෙන්න පුළුවන් කියල කියපල්ල . කවුරු හරි ඇහුවොත් පිටරටක පිරිමි කෙනෙක් ලංකාවේ ගෑණු කෙනෙක් බැන්ඳොත් පුරවැසි කම ලැබෙන්නෙ නැහැ නේද කියල, ප්‍රශ්ණෙ තේරුන් නැති විදිහට මොනව හරි වැල් වටාරම් ටිකක් කියපල්ල. 

දකුණු ඉන්දියන් කාර දෙමළු පාලම දිගේ ඇවිදගෙන ඇවිත් මෙහෙ පදිංචි කොරන්න පිටරට ඉන්න එල් ටී ටී යී කාරයෝ ක්‍රියා කොරයි කියලත් බය කරපල්ල. දැනටත් ඉන්දියන් කාරයන්ට වීසා නැතුව කටුනායකින් ගොඩබහින්න පුළුවන් එකේ  ඕන නම් ඒක දැනුත් කරන්න පුළුවන් නේ කියල කවුරුහරි කිව්වොත් ඌට දේශ ද්‍රෝහියා කියල බැනපල්ලා.

ඔය පාලම දිගේ එන එවුන් අපේ ඉඩම් ටික ඔක්කොම සල්ලිවලට ගනියි කියලත් බය කොරපල්ල. ඒ උනාට ලංකාවේ නීතිය  අනුව පිටරට මිනිස්සුන්ට ලංකාවේ සින්නකර අයිතියට ඉඩම් ගන්න බැහැ කියල කවුරුහරි කිව්වොත් ඌට අල්ලගෙන තඩිබාපල්ල. 

කියපල්ල ඉන්දියාවේ බඩු ඔක්කොම මෙහෙ එවල අපේ නිශ්පාදන ඔක්කොම නැතිවෙයි කියල. දැණුත් වැඩිහරියක් බඩු එන්නේ ඉන්දියාවෙන් හරි චීනෙන් හරි කියල හරි දැන් මෙහෙ හදන ලබ්බක් නැහැ කියල කියන එකෙක් හිටියොත් හිමීට මඟ ඇරපල්ලා. පාලමක් දැම්මට ඔය ඕන ඕන එකාට එන්න බැරිවෙන්න ආගමන හා විගමන දෙපාර්තමේන්තුවයි ඕන ඕන බඩු එවන්න බැරිවෙන්න රේගුවේ කට්ටියයි  ඇතුල්වෙන තැන ඉන්නව කියන එක ඔය මෝඩයන්ට තේරෙන්නෙ නැහැ. 

ඉන්දියාවට පාලමක් හරහා සම්බන්ධ වෙන එක ලංකාවේ ආරක්ශාවට ලොකු තර්ජනයක් කියල බය කොරහල්ල. ඉන්දියාව හදල තියෙන අග්නි මිසයිල් එක ඉන්දියාවේ උතුරු කොනේ ඉඳන් විද්දත් ලංකාවට ගහන්න පුළුවන් කියල ඔය ගොඩක් දෙනෙක් දන්න එකක්යැ.

ඉන්දියාවේ ඉන්න රස්සාවල් නැති එවුන් ඔක්කොම මෙහෙට ඇවිදගෙන ඇවිල්ල අපේ රස්සා ටික නැතිවෙයි කියල ඔය කලා උපාධි එහෙම කරන විශ්ව විද්‍යාල ළමයි ටික පාරට බස්ස ගන්න බලපල්ල. ඔය ගොඩක් දෙනෙක් දන්නෙ නැහැ පිටරට කෙනෙක්ට ලංකාවේ රස්සාවක් කරන්න නම් වර්ක් පර්මිට් ගන්න ඕන කියල. අනික ඒ වර්ක් පර්මිට් දෙන්නේ මෙහෙ ඒ රස්සාවට මිනිස්සු නැහැ කියල ඔප්පු කරාම කියලත් උන් දන්නෙ නැහැ.

ඉකොනොමැට්ටා මහතාත් මේ පාලම් පිස්සුවෙන් සිද්ධ වෙන්න පුළුවන් තවත් අවාසි කමෙන්ට් කරල තිබ්බා. ඒවා ටිකත් මම දාන්නම් උඹලට උදව්වට. පාලමේ යන එවුන් කාලා ඉතුරුවෙන ඒවා මුහුදට විසිකළාම ඒ පරණ පාන් කලා මාළුන්ට බඩ ගියාම  අතිවිශාල පරිසර දූශණයක් වෙනවා, ඒවගේම ටොයිලට් පාවිච්චිය ගැන එච්චර මනාපයක් නැති ඉන්දියන් කාරයෝ පාලමේ ගැට්ටේ ඉඳගෙන අර වැඩේ කළාම, ඒවට රහ වැටිලා දකුණු මුහුදේ ඉන්න මාළු උතුරට පීනලා ගියාම දකුණේ ධීවර ප්‍රජාවට යන එන මං නැතිවෙනවා, අනික අපේ හාමුදුරුවරු කෝච්චියේ නැගලා ඉන්දියාවට ගිහිල්ල බණ කියන්න ගත්තොත් දානෙකට බණකට හාමුදුරු නමක් වත් හොයා ගන්න බැරිවෙනවා. ඒ බණ අහල ඉන්දියාවේ ජනගහණයෙන් සීයට දෙකකට වඩා බුද්ධාගමට හැරුණොත් ථෙරවාදී බෞද්ධයන් වැඩියෙන්ම ඉන්න රට හැටියට අපිට තියෙන තත්ත්වය නැතිවෙනවා. භයානකම දේ තමයි රට බෙදෙන්න පුලුවන් පාලමෙන් යට සහ පාලමෙන් උඩ කියලා. මේ අතිරේක අවදානම් ටික මතක් කරල දුන්නට ඉකොනොමැට්ටා මහත්තයට හැමෝගෙම ස්තූතිය හිමිවෙන්න ඕන.

මේක සුළුවට අරං අපේ මේ ඉන්න තත්ත්වෙ නැති වෙන එකනම් වෙන්න දෙන්න එපා