අල්මාරියක් විකිණීමට තිබේ.

සිතුවිලි සිතූ ගේ පෝලිම ලිපිය නිසා තමයි මේක ලියන්නට ඉන්ස්පිරේශන් එක ලැබුණෙ. මේක කියවල එක් කෙනෙක් හරි පොඩ්ඩක් හරි වෙනස් වුණොත් මහන්සියේ ප්‍රතිඵල ලැබුණ වෙනවා. සිතූ කිව්වේ පෝලිමක ඉන්න බැරි අනික් අය තමන්ට විශේෂ සැලකිල්ලක් දැක්විය යුතුයැයි සිතපු කෙනෙක් ගැන. එම ලිපියට මගේ කමෙන්ට් එකට ලියපු දෙයින් පටන් ගන්නම්. 

එක් එක් සමාජ වල බල පරතරය (power distance ) කියල එකක් තියෙනව කියල සමහර අය දන්නව ඇති. මෙම බල පරතර සීමාව එක් එක් රටවලට වෙනස් වෙනවා. ලංකාව hierarchical society එකක්.  එම නිසා බල පරතරය වැඩියි.  එම නිසා බල පරතර හිණිමගේ උඩින් ඉන්නවා යැයි සිතන අය අවස්ථාව බලා  නොබලා එම තරාතිරම් ප්‍රයෝජනයට ගැනීමට උත්සාහ කරනවා.

සමහර විට එකම සමාජයක් ඇතුලේ අනු සමාජ අතරත් බල පරතර වෙනස් වෙනවා. උදාහරණයකට අවුරුදු 100 ක් විතර පරණ ආයතන වල විවිධ ශ්‍රේණි අනුව විශාල හයරාකි එකක් තිබෙන්න පුළුවන්. ඒ අනුව තමන්ට එක ඉහල ශ්‍රේණි වල ඉන්න අයට සර් / මැඩම් කියල ආමන්ත්‍රණය කල යුතු වෙනවා. එම සමාජයේම තිබිය හැකි සමහර නවීන ආයතන වල කාර්‍යාලයය සුද්ද කරන කෙනාට අයිති කාරයට නම කියල කථා කරන්නත් පුළුවන්. 

මෙම බල පරතර ඇතිකරන තරාතිරම  එක අවස්ථාවක ඉඳලා තව අවස්ථාවකට ගෙනියන්න පුළුවන් (portable) එකක් නම් නෙමෙයි. එම බල පරතරය අදාල වෙන්නේ එයට සම්බන්ධ අවස්ථාවකට විතරයි. උදාහරණයකට කාර්‍යාලයේ දරණ තනතුර අදාල වෙන්නේ කාර්‍යාලය තුල හෝ කාර්‍යාලයට අදාල කටයුතු වලදී විතරයි. ඒක ගෙදරට, ළමයගේ ඉස්කෝලෙදි, සුපර් මාර්කට් එකේදි, ගමේදි, අදාල කරගත යුතු නැහැ. වුවමනා කමින් හෝ අමතක වීමකින් හෝ වෙන අවස්ථාවකට ගෙනියන්න හදපු කෙනෙක්ගෙ උදාහරණයක් තමයි  අර සිතුවිලි සිතූ අත්දැකපු පෝලිමේ සිද්ධිය.  මේ තරාතිරම් කරුණ ගැනම කොලඹගමයා ලියපු පෝස්ට් එකක් මෙතන තියෙනවා. මෙලෙස වන්නේ කාර්‍යාලයකදී යමෙකුට තනතුරක් නිසා ලැබෙන sense of entitlement හැඟීම එම තරාතිරම අදාල නොවන ස්ථානයකදීත් ලැබියයුතු යැයි සිතීම නේද? 

අපි අතිනුත් මේවගේ වැරදීම් එහෙම නැත්නම් තරාතිරම් අදාල නොවන අවස්ථා වලට ගෙනියන අවස්ථාවල් වෙලා තියෙනවද? හිතල බලන්න. එහෙන් මෙහෙන් නෝටිස් වෙච්ච කීපයක් ගැන ලියන්නම්. 

කාර් විකුණන දැන්වීම් වල 'වෛද්‍යවරියකට අයත් වාහනයක් විකිණීමට තිබේ' කියල දාන එකෙන් අදහස් කරන්නේ මොකද්ද? වෛද්‍යවරියක් පරිහරණය කරන ලද වාහනයක විශේෂත්වයක් තියෙන්න පුළුවන්ද?  Automobile Engineer කෙනෙක් පරිහරණය කල වාහනයක නම් සමහර විට විශේෂත්වයක් තියෙන්න පුළුවන් මොකද එම පුද්ගලයා වාහන ගැන දන්නා නිසා වාහනය ක්‍රමානුකූලව නඩත්තු වෙලා තියෙනවා කියල හිතන්න පුළුවන්. මෙතනදී වෛද්‍යවරියක් කියලා කරන භාවිතාව කිසිම ගැලපීමක් නැහැ. ඒ වුණාට වාහනය විකුණන පුද්ගලයා වෛද්‍යවරියකට අයිතිය තිබූ නිසා කියා වැඩි වටිනාකමක් ඇතැයි කියා සිතනවා ඇත්ද?

කොලඹ වෛද්‍ය විද්‍යාලය සහ නේවාසිකාගාර අසල පාර පාවිච්චි කරන කෙනෙකුට දැකිය හැකි දෙයක් තමයි සුදු කෝට් ඇඳගත්තු තරුණ තරුණියන් එහාට මෙහාට යන එක. මේගොල්ල වෛද්‍යවරු නෙමෙයි. බොහෝ විට වෛද්‍ය ශිෂ්‍යයන්. වෛද්‍යවරයෙක් ලෙඩුන් පරීක්ෂා කරන අවස්ථාවකදී වෛද්‍යවරයාගේ ඇඳුමේ තිබෙන විෂබීජ ලෙඩාට යාමට ඇති ඉඩ අඩු කිරීමට එම අවස්ථාවලදී උඩින් පොරවනයක් ලෙස සුදු ලැබ් කෝට් එකක් පැලඳීම සුදුසු වෙන්න පුළුවන්. එම කෝට් එක පාරේ දුහුවිලි සහ විෂබීජ බහුල ස්ථානවල ඇඳගෙන යාමෙන් එම පරමාර්ථය සම්පූර්ණයෙන්ම නිශේධනය වෙනවා. මේ අය මෙම ලැබ් කෝට් එක ලෙඩුන් නැති පාරවල් දිගේ සහ අනිකුත් ප්‍රසිද්ධ ස්ථානවල ඇඳගෙන යන්නේ අදාල නැති තරාතිරමක් අදාල නැති අවස්ථාවකට යොදා ගැනීමට නේද?  වෛද්‍ය සිසුන්ට දෙවන වසරේදී සිට පාවිච්චි කලයුතු ස්ටෙතස්කෝප් එකත් ආරක්ෂාකාරීව රැගෙන යනවා වෙනුවට කරේ දාමගෙන හෝ අතේ තබාගෙන කරකවමින් පාරේ යන්නේ ඔවුන්ව දකින අය වෛද්‍ය සිසුන් කියා ඔවුන්ට විශේෂ සැලකීමක් කරනු ඇතැයි බලාපොරොත්තුවෙන්ද? එහෙම නැත්නම් අනික් අයට වඩා මම උසස් යැයි සමාජයට සංනිවේදනය කිරීමටද? 

සමහර භික්ෂූන් ඔවුන්ගේ දැනීම ඇති දේවල් වල යෙදීම පසෙක තබා දේශපාලනය, යුද්ධ ක්‍රම පිලිබඳව හමුදාවට උපදෙස් දීම, ආදියත් අදාල නැති දේවලට තරාතිරම යොදවා ගැනීමට උදාහරණයන්. දේශපාලකයින් ඔවුන්ගේ තරාතිරම පාරේදී, වෙන අයගේ උත්සව වලදී, ගුවන් යානා වලදී, පෙන්වන අවස්ථා නම් ඉතා බහුලයි. එයත් ලංකාව, ඉන්දියාව වැනි නොදියුණු සමාජ වල බහුල දෙයක්. එසේ නොහැසිරෙන නිහතමානී දේශපාලකයෙකු ගැන ඔබට කැමැත්තක් ඇතිවෙනවා නේද?

ඔබටත් මෙලෙස අදාල නොවන අවස්ථාවලට තමන්ගේ තරාතිරම ගෙනියාමට හිතෙන කෙනෙක්ද? එසේ නම් මේ ගැනත් සිතන්න.  ඔබ වෙන පරිසරයකට අදාලව ඔබට තිබෙන තරාතිරම අදාල නොවන ස්ථානයකට ගෙනගියොත් එය අදාල පරිසරයේදී මෙන් නොව අදාල නොවන පරිසරයේ සිටින අය ඔබගේ තරාතිරම ගණන් නොගන්නා අය හෝ එම තරාතිරම  අදාල නොවන අය නිසා එසේ කිරීමෙන් අපහසුවට හෝ ලැජ්ජාවට පත්වීමට සිදුවන්නේ ඔබටමයි. එමෙන්ම තමන්ගේ භාෂා හැකියාව දියුණු කර ගැනීමේ අදහසකින් නොවේ නම් ඔබ දන්නා විවිධ භාෂා වලින් සාමාන්‍ය අවස්ථාවල කථා නොකර හැමෝටම පොදු වඩාත් පහසුවෙන් තේරෙන භාෂාවකින් කථාකරන්න. සුපර් මාර්කට් එකකදී හෝ පිරිසක් මධ්‍යයේ හෝ වෙන අදාල නොවන සමාජයකදී ඔබගේ දැන උගත්කම්, සුදුසුකම්, තරාතිරම ආදිය ප්‍රදර්ශණය කිරීමට හෝ ඒ ගැන කථා කිරීමට හිතෙන අවස්ථාවලදී හිතාමතාම එයින් වැලකීමට උත්සාහ කරන්න. ඔබගේ තරාතිරම ආදිය ඔබට ලොකු දෙයක් වූවාට ඔබගේ තරාතිරම අදාල නොවන අයට ඒවා අසා සිටීමට විශේෂ ආසාවක් හෝ උනන්දුවක් නැති බව සිහි කරන්න. 

වෙන කෙනෙක්ගේ සුදුසුකම්, හැකියාවන්, ආදිය හදවතින්ම අගය කරන අය සමාජයේ ඉතා අඩු බව තේරුම් ගන්න. යම් කෙනෙක් ඔබ ගැන අතිශෝක්තියෙන් කථා කරනවා නම් එම පුද්ගලයා ඔබව මුරුංගා අත්තේ තබා එයින් ඔහුට වාසියක් අත්කර ගැනීමට උත්සාහ කරන පුද්ගලයෙකු විය හැකියි. පාරම්බාන එක ඔබගේ දුර්වල කමක් නම් එය දන්නා අය ඔබට බයිට් එකට ගැනීමටත් ඉඩ තියෙනවා. ඔබ එවන් 'ප්‍රසංශා' අගය කරන හෝ හොය හොයා යන කෙනෙක් නම් අන් අය ඔබව එසේ මුරුංගා අත්තේ තබා සිනහ වෙන එක ඔබට නොපෙනේ. 

ඔබ පාරම්බාන අයට අකමැති වගේම අන් අයත් ඔබ ඔබ ගැන පාරම්බානවාට අකමැති නේද යැයි සිතන්න. බොහෝ විට උගත්කම්, සුදුසුකම්, තනතුරු, දන්නා අය, හැකියාවන් ගැන කියවන්නේ ඒවා ඇත්තටම නැති උදවියයි. ඒවා ඔබට තිබේ නම් ඔබත් ඒ ගණයට වැටී ඔබගේ තත්ත්වය බාල කර ගන්නේ ඇයි? 

ඔබ උද්දච්ච පුද්ගලයෙකු ලෙස සමාජයේ ගැරහුමට පාත්‍ර වෙනවාද එසේ නැත්නම් නිහතමානීව හැසිරෙන අයකු ලෙස පෙනී සිටිනවාද යන්න තනිකරම ඇත්තේ ඔබ අතේ බව අමතක කරන්න එපා.

අවසාන වශයෙන් මොඩිෆයි කරපු විහිළුවක්. එක්තරා වෛද්‍යවරියකට අල්මාරියක් විකිණීමට අවශ්‍ය වුණා. එම අල්මාරියේ විශේෂත්වය එහි කකුල් බුරුත දැවයෙන් සාදා තිබීම. සමහර දැන්වීම් වල ඔය කොමා එක එහෙම මිස් වෙනවානේ. මෙම තැනැත්තියගේ දැන්වීම පුවත්පතක පළ වුණේ මෙහෙමයිලු.

බුරුත කකුල් ඇති වෛද්‍යවරියකට අයත් අල්මාරියක් විකිණීමට තිබේ.