පොල් මැල්ලුම් ඡානරයේ කථාවක් ලියන්න පුළුවන්ද?

සම්බෝල කෙටීම

ඔය එක එක විකාර ලිව්වට මට කවදාවත් ප්‍රබුද්ධ කථා නම් ලියන්න කිසිම හැකියාවක් නැහැ. ඒ ඔය ප්‍රබුද්ධ කථා ලියන අයගේ තියෙන ලැටරල් තින්කින්ග් එක මට බැරි නිසා වෙන්න ඇති මට තියෙන්නේ ලීනියර් හිතන ක්‍රමයක්. ඕකෙන් ගැලවෙන්න හිත හිතා හිටපු කාලෙක  අපේ ප්‍රවීණ බ්ලොග්කාරිණියකගෙ ප්‍රබුද්ධ මොඩල් එකේ කථාවක් කියවල මෙහෙම අදහසක් ආවා. ඒ තමයි පොල් මැල්ලුම් ඡානරයේ කථා ලිවීම. 

පොල් මැල්ලුම් ඡානරයේ කථා ලියන්නේ මෙහෙමයි

එකිනෙකට සම්බන්ධ නැති කෙටිම කෙටි කෙටිකථා තුනක් කලින් ලියන්න. ඒ සඳහා ඔබ දැනටමත් ප්‍රසිද්ධ කර ඇති කථා එකකුත් හෝ දෙක තුනකුත්  යොදාගත්තට කිසිම ප්‍රශ්ණයක් නැහැ. ඒ කථා තුන එකිනෙකට වෙනස් කථා තුනක් නම් වඩා හොඳයි. ඒ කියන්නේ ආදර කථාවක්, අතීතකාම කථාවක්, ත්‍රාසය, සත්‍ය කථාවක් වගේ වෙනස් කථා තුනක් ගන්න එක වඩාත්ම හොඳයි. එහෙම නොවුණත් ප්‍රශ්ණයක් නැහැ.

ඊලඟට එක කථාවක එක ඡේදයක් මැල්ලුම් කථාවට කට් පේස්ට් කරන්න. දෙවෙනි ඡේදය හැටියට අර තුනෙන් වෙන කථාවකින් ඡේදයක් කට් පේස්ට් කරන්න. ඊලඟ ඡේදයට තව කථාවකින් ඡේදයක් දෙකක් ආදී වශයෙන් කට් පේස්ට් කරමින් මේ කථා තුන එක මැල්ලුම් කථාවකට හොඳට අනන්න. මැල්ලුම් වගේම අනන තරමට තමයිළු රස. පොල් මැල්ලුම හොඳට ඇනුවම පොල් කොටස මුල ඉඳලම ඒ පාටට, ඒ රසට තිබුණ වගේ පේනවනෙ. ඒ නිසා හොඳට ඇනීම තමයි මේ තියෙන්නේ කථා තුනක් නොව එක කථාවක් කියල කියවන්නා හිතන්නේ. 

මේ අවස්ථාවෙදී හෝ කථා තුන ලියන මුල් අවස්ථාවෙදී කථා තුනම සම්බන්ධ කරන දෙයක් පාවිච්චි කළොත් මැල්ලුමට හොඳට දෙහි දැම්ම වගේ තමයි. ඒ කියන්නේ මුලින් ලියපු කථා තුනේම එක පොදු ස්ථානයක් එකතු කිරීම. ඒ කියන්නේ ඒ තුනේම විහාර මහා දේවී පාක් එකේ යමක් වෙනවා. එහෙම නැත්නම් කථා තුනේම කථා නායකයා හෝ එක චරිතයක් එකම නමකින් ඉන්න එකම කෙනෙක් ආදී වශයෙන්. එහෙම නැත්නම් කථා තුනේම එක වෙලාවක වෙන එක සිද්ධියක් පොදු කරන්න. උදාහරණයකට බෝම්බ පිපිරීමක් වගේ.  එහෙම නැත්නම් එක කථාවක කෙනෙක් සිගරට් එකක් බීල විසිකරණකොට ඒක අනික් කථාවේ චරිතයේ ඔඩොක්කුවට වැටිල ගිණිගන්නව වගේ දෙයක්. 

අන්තිමට මොනවහරි හිතට එන දාර්ශණික වචන ටිකක් හරි පාඨයක් ලියල මැල්ලුම සෑදීම ඉවර කරන්න. ඒක අවශ්‍යමත් නැහැ. නමුත් කථාව ඉවර කරන විදිහත් සාර්ථකත්වයට බලපානව නේ. 

ඔව් ඔව් දුමී මේ ක්‍රමයට 'ප්‍රබුද්ධ' කවිත් ලියන්න පුළුවන් ඇති.

අන්තිමටම යූටියුබ් එකෙන් මොකක් හරි සිංදුවක් තෝරගෙන ඒකත් කථාවෙ පහලට එකතු කරන්න. ඒ සිංදුවේ එන මොකක් හරි පදයක්, අවස්ථාවක්, සිද්ධියක් උඩ තියෙන එක කථාවකට සම්බන්ධ කරන්න පුළුවන් නම් මරු.

ඔයාලත් මේ ක්‍රමයට පොල් මැල්ලුම් ඡානරයේ කථාවක් ලියලා බ්ලොග් එකේ ප්‍රසිද්ධ කළොත් මම ඇර වෙන කවුරුහරි යොදවල තෝරගන්න හොඳම කථා තුනට සුළු තෑගි දෙන්න හිතුණා.  තරඟයට අදාල කාලය අද සිට ජූනි 30 දක්වා. විනිශ්චය කරන කෙනා තෝරාගන්නා හොඳම කථාවට රු. 15,000/=, ඊලඟ එකට 10,000/=, තුන් වෙනි එකට  රු. 5,000/=. ලී කෑලි නැහැ. එහෙම නැත්නම් ඔබ වෙනුවෙන් ඔබ කියන චැරිටි එකකට ඔබේ නමින් එම මුදල් පරිත්‍යාග කරනවා.

මේ පෝස්ට් එක ප්‍රබුද්ධ කථා රචකයන්ට අපහාසයක් හෝ උපහාසයක් ලෙස ලිවූවක් නෙවෙයි. විස්කි අරක්කු නැති අය කසිප්පු ටිකක් හරි පෙරාගන්නව වගේ ප්‍රබුද්ධ කථා ලියන්න හැකියාව අඩු නම් පොඩි කසිප්පු වඩියක් පෙරල බලනව වගේ එකක් පමණයි. මම මේක ඉගෙනගත්තේ බ්ලොග්කාරිණියකගේ පරණ ලියපු කථාවකින්. ඒ කවුද කියල නම් අහන්න එපා. ඇහුවොත් ඔන්නොහෙ උපේක්ෂාසහගත උත්තරයක් දෙනව මිසක් කවුද කියලනම් කියන්නෙ නැහැ. 

 මේක ඇත්තටම අත්හදා බලන්න.

මෙම අඩවියේ පළවන ලිපි කොපි කිරීමට හෝ වෙනස් කතෘ නාමයක් යටතේ අන්තැනක පළකිරීමට කිසිම බාධාවක් නැත. අන් ස්ථානවලින් කොපි කර මෙහි පළකරන ලිපි වලට නම් එම කතෘ වරුන්ගේ කොන්දේසි අදාල වේ.