මගේ ආදර කථාව ගීතයකින්

පහු ගිය දිනවල අනික් බ්ලොග් කියවනකොට තේරිච්ච දෙයක් තමයි හැමෝගෙම හරිගිය නැති පරණ ප්‍රේම කථාවක් තියෙන බව. මගේ අනුමානය නම් අඩුම ගණනේ 60% කට විතර තමන් ආදරය කරපු කෙනාම විවාහ කරගන්න වෙන්නේ නැහැ. ඒ හැමෝටම වගේම මටත් ආදර කථාවක් තිබුණා. මට සිද්ද වුනේ දෙමව්පියන්ගේ බල කිරීම මත මගේ ආදරයට සමුදෙන්න. මට තනි තීරණයක් ගන්න කොන්ද පණ තිබුනේ නැති නිසා ඒ කාලේ හිටපු අපේ පොදු යාළුවෝ ඔක්කොම වගේ මගෙත් එක්ක තරහ උනා.


ඇය වෙන කෙනෙක් එක්ක විවාහ උනා විතරක් නෙමෙයි මට වෙඩිං එකට එන්නම ඕනෙ කියල ඉල්ලීමකුත් කළා. බොහොම අමාරුවෙන් හිත දැඩි කරගෙන මම එයාගේ වෙඩිං එකටත් ගියා. මම එයා බැඳපු කෙනා කලිනුත් දැනගෙන හිටියා. එයත් අපි දෙන්නා ගැන දන්නවා. ඒ හෝල් එකේ හිටපු ගොඩක් දෙනෙක් අපි ගැන දන්න අය නිසා ඒගොල්ලන්ගේ ප්‍රශ්නකිරීම් විමසිලි ඇස් වලට මූන් දීගෙන දිගටම ඉන්න මානසික තත්වයක් මට තිබුණෙ නැති නිසා ටික වෙලාවකින් මම එතනින් යන්න ගියා. විවාහයට පස්සේ එයාගේ හස්බන්ඩ් එක්ක එයා විදේශ රටකට ගියා. ෆේස් බූක්, ජංගම දුරකතන වගේ දේවල් ගැන හිතලවත් නොතිබුණ ඒ කාලේ විස්තර දැනගන්න ක්‍රමයක් තිබුනේ නැහැ. පසු කාලෙක විදේශ රටකදි මට ඒ ගොල්ලන්ව හම්බුවුනා. අදටත් ඒ ගොල්ලො ලංකාවට ආවම මට එම දෙපලම හම්බුවෙනවා . එයාගේ හස්බන්ඩ් ඒ අතින් හරි පරිණතයි. මමත් කිසිම දිනයක ඔහු මා කෙරෙහි ඇති විශ්වාශය බිඳින්න සූදානම් නැහැ.එයා ඉහල සැප සම්පත් සහිත ජීවිතයක් බටහිර රටක ගෙවන එක ගැනත් එයාගේ හස්බන්ඩ් එක්ක ඉතා සාමකාමී සහ මම හිතන විදිහට සතුටු ජීවිතයක් ගෙවන එක ගැන මට බොහොම සතුටුයි.

මීට අවුරුදු කීපයකට උඩදි මම ඒ ආදරය අලලා ගීතයක් ලිව්වා. විශාරද නවරත්න ගමගේ ඒකට සංගීතය නිර්‍මාණය කළා. 2011 දි විතර රනිල් මල්ලව ආරච්චි ලංකාවට ආපු කාලෙක ඒ සින්දුව ගායනා කලා. මේ සින්දුවට පස්සේ මම වෙන මාතෘකා යටතේ තව ගීත කිහිපයක් ලිව්වත් මගේ අත්දැකීමක් ගැන මම ලියපු එකම සින්දුව මේකයි. ඒවගේම වීඩියෝ එකක් කරපු මගේ එකම ගීතයත් මේකයි. මේකෙ රඟපාන්නේ බිමල් ජයකොඩි සහ රිතු ආකර්ශා යන නළු නිලියන් දෙදෙනා. ඔබට ඒ ගීතයේ රස විඳල ඒ ගැන අදහස දක්වන්න ආරාධනා කරනවා. මම ලියපු අනික් ගීතත් එකෙන් එක පසුව දාන්නම්.      

කඳුලක් නැංවූ, හැම මොහොතක් ගැන, අයදිමි ඔබෙන් කමා

පැරදුණු අප පෙම, ගැන මම ලතැවෙමි, පියවුණු දෙනෙත් තෙමා

දෙඅතක සිටියත්, හමුනොවුණත් අපි, නලළට නලළ තියා

සිහිනෙන් ඇවිදින්, මගෙ සිත පිරිමැද, සිප සනසන්න මෙමා

නොකැළල් කුළුඳුල්, ඔබෙ හද දිනුමට, මා හට ලැබුණි වරම්

යෞවනයේ ඇති, නොඉඳුල් සුන්දර, විඳිනට ලදිමි වරම්

පෝරුව මත හිඳ, සුලැඟිලි අල්ලා, හූයෙන් බැඳෙන තරම්

දෙවියනි ඇයි මා, හට නොමදුන්නේ, ඔබ හිමි වෙන්න වරම්

හැඟුමන් සිරවී, හදවත් ගොළු වුනු, දිවියෙම අඳුරු පැයේ

නෙතින් ගතින්  සමු, ගනිමින් නොහෙලූ, කඳුලක් තවම තියේ

සොඳුරු සෙනෙහසේ, සුමිහිරි මතකය, කිසිදා මැකී නොයේ   

මේලොව මා නෙලු , සුන්දරතම මල, ඇයි ගිලිහිලා ගියේ 

සංගීතය විශාරද නවරත්න ගමගේ 
ගායනය රනිල් මල්ලවාරච්චි